Селим — дуьньядин чемпион

Чна газетдин алатай нумрадани хабар гайивал, 4-8-декабрдиз Москвада пауэрлифтингдай дуьньядин чемпионат кьиле фена. Залан атле­тикадик акатзавай спортдин и жуьре са шумуд хилекай ибарат я.

V сеферда  тешкилай дуьньядин акъажунра Рос­сиядай, Испаниядай, Германиядай, Бельгиядай, США-дай, Израилдай, Финляндиядай, Туьркиядай, Австралиядай ва хейлин маса уьлквейрай 3 агъзурдалайни гзаф пагьливанри иштиракна.

Шадвилелди къейд  ийиз жеда, дуьньядин чемпионатда иштиракайбурун жергеда къурушви жаван пагьливан  Селим  Башировни  авай. Дагъви пагьливанди акъажунра 60 килограммдин заланвал авайбурун арада “народный жим” хиляй дуьньядин чемпионвилин тlвар къазанмишна. Ада вичин заланвилиз (60 кг) барабар штанга 24 сеферда хкажна.

Пагьливанди вич спортдин рекье вердишарай Фейруз Къулиеваз, чемпионат кьиле фейи йикъара Москва­да куьмек гайи халудин дуст Абзудин Урдихановаз сагърай­ лугьузва.

Докъузпара райондин Къурушрин хуьре Рудинан хизанда 2001-йисуз дидедиз хьайи Селим алай вахтунда Дербент шегьерда яшамиш жезва. КIвалахдикай азад вахтунда ам вичин халу, тренер-насигьатчи Фейруз Къулиеван регьбервилик кваз 2015-йисалай залан атлетикадал машгъул жезва. Аквазвайвал, Фейруза хтулдик кутур умудар жаван пагьливанди  буьнжуькьарзавач.

Пауэрлифтингдай кьиле фейи Дагъустандин чемпионатрани ада алатай йисара агалкьунралди иштиракна. 2017-йисуз ада Дагъустандин чемпионатда, вичин заланвал 57 килограмм яз, 75 килограммдин заланвал авай штанга хкажнай.

Чна Селимаз гъалибвал тебрикзава. Къуй адан агалкьунар дуьньядин дережада мадни тикрар хьурай!

К.Къалажухви


Всего просмотров: 230
Подпишитесь на наши каналы:

Читайте также:


Новости партнеров