Сейли пешедин сагьибризни хвеши авуна

Мукьвара уьлкведин регьберди Федеральный Собранидиз ракъурай гьар йисан Чар халкьдин гегьенш къатари веревирдзава ва и кар яргъалди давамни жеда. Малум хьайивал, В.Путин и сеферда гзафни-гзаф ватандашрин яшайиш хъсанарунихъ элкъуьрнавай кар алай месэлайрикай рахана.

За В.Путинан Чарче мектебра классриз регьбервал гузвай муаллимрин мажибрал 5 агъзурдалай тIимил тушиз алава хъувунин къарар лап важиблуди яз гьисабзава. Рекъем зурбади туш­тIани, муаллим лагьай пак пешедин сейливал, нуфузлувал са чипIинин виниз хкаж хъувунин кам яз къачуз жеда.

Эхь, и сеферда Президентди важиблу пешедин иесийризни ­хвеши авуна. Муаллимар хъсанбур хьун ва абурук чпи ийизвай кIва­лах мадни менфятлудаказ кьиле тухудай руьгь кутун патал зегьметдин гьакъини ягьанатдай жуьрединди хьана кIандач эхир.  Икьван чIавалди авай гьалари, иллаки чи республикада, са муаллимни, са директорни шадарзавачир.

Гьакъисагъвилелди классдиз регьбервал гузвай муаллимдин хиве еке жавабдарвал ава, адан гуьзчивилик хьана кIанзавай месэлаярни тIимил туш. Гьавиляй Президентдини им тIимил важиблу тушир месэлайрикай яз гьисабна. Кьилди къачуртIа, ада къейдна: “Ученикриз виридалайни гзаф абурун классрин регьберар мукьва я. Им чIехи жавабдарвал, кьетIен жуьреда гьазур хьун герек тир кIвалах я. 1-сентя­брдилай классрин регьберриз федеральный бюджетдин такьатрин гьисабдай 5 агъзур манатдилай тIимил тушир кьадарда аваз алава такьатар гун теклифзава”.

Аквадай гьаларай, уьлкведин Президентди мектебра классрин регьбервиле кIвалахзавай му­аллимрин гьакъиндай гьукумди къалурзавай “къайгъударвал” лап адалатсузди тирди аннамишна. Гьелбетда, муаллимри ийизвай арза-ферзеярни гьукуматдин кьилив агакь тавуна туш. Класс­дин регьбер я лугьуз, вичи тайин предметдай гузвай тарсарилай алава яз муаллимдин хиве еке жавабдарвал, везифаяр тун, герек авачир чарарин-цIарарин патахъай муаллимдик артухан тIурутIум кутун ва гьа са вахтунда гьакъидин еринда кепекар гун?.. Ихьтин гьалар авайла, шаксуз, кIвалахни бегьерлуди ва нетижалуди жедач. Кардив рикI гваз эгечIдай ашкъини хьана кIандачни бес!

Муаллимвилин пешедиз гьи-кьван гзаф фикир гайитIа, гьа­кьван­ гзаф хийирни жеда. Идалайни гъей­ри, муаллимар чебни да­тIана­ чпин тагьсил хкажунал, цIийи къай­даяр арадал гъунал, абур теж­рибада иш­­лемишунал машгъул хьун чара­суз я. Маш­гьур математик М.Остроградскийди лагьайвал, хъсан му­ал­лимри хъсан ученикарни гьазурда.

К. Ферзалиев


Всего просмотров: 51
Подпишитесь на наши каналы:

Читайте также:


Новости партнеров