Себеб- жавабдарвал тахьун

И мукьвара  “Лезги газетдин” редакциядиз  Мегьарамдхуьруьн райондин Хъартас-Къазмайрин хуьре яшамиш жезвай  Ярагьмед  Ярагьмедовалай  тава­къудин  чар атана. Ада кхьизва:

“Гьуьрметлу редакция! Мегьарамдхуьруьн райондин Хъартас-Къазмайрин, Сулейман-Стальский райондин ДаркIушрин, Кьурагь райондин Кумухърин ва Дербент райондин ЛукIварин хуьрерин, гьакI­ни Белиж поселокдин агьалийрин патай  Квез кхьизвайди Ярагьмед Ярагьмедов я. Кар ана ава хьи, винидихъ за тIва­рар кьунвай вири хуьрера электроэнергиядалди таъминарунин карда мукьвал-мукьвал  ара  атIунар, къайдадик квачирвал жезва. Идахъ галаз алакъалу яз  хуьрерин агьалияр четин гьалара гьатзава, гьикI ла­гьай­тIа, абурун яшайишдин шартIар электроэнергиядилай еке аслувиле ава. Электричестводалди таъми­нарунин карда ара атIунар хьун себеб яз,  гзаф агьалийрин кIвале­ра ишлемишзавай техника (телевизорар, холодильникар) къайдадикай хкатзава, инсанар хъвадай яд авачиз амукьзава ва икI мад. Чаз малум тирвал, чи хуь­рериз Дербент  шегьердин электрический сетри къуллугъзава, подстанция лагьайтIа, Бе­лиж по­селокда ава.

ТIалабзава Квевай и месэладай кьил акъудун ва чи хуьрера электроэнергиядалди таъминарунин карда  датIана  нукьсанар хьун квехъ галаз алакъалу ятIа чирун”.

Редакцияди  агьалийрин арза  “Дагъустандин сетевой компания” АО-дин идара ийизвай директор  Муртаза­ли Гитинасуловав  агакьарна ва  и хуьрера татугай гьа­лар­ арадал атунин себебар гьихьтинбур ятIа, гьадан гъа­­вурда тун тIалабна. Идарадай хтай жаваб  ихьтинди я:

“Гьавадай физвай виниз тир напряженидин  (10 киловольт) линиядин  “Белиджи” фидердин  (№ПС 110/35/10кВ) кIвалах ахтармишунин нетижада малум хьайивал, Дербентдин РЭС-рин ОДГ-дин журналдин кхьинрал  асаслу яз, ЛукIварин,  Кумухърин, Хъартасрин ва ДаркIушрин хуьрер  электроэнергиядалди таъминарзавай  1-нумрадин фидер 2018-йисан 1-июндилай 25-декабрдалди 18 сеферда хкатнай. Бязи вахтара ам, арзайрин бинедаллаз, ремонт авун патал  хкудзавай.

Амма чIехи пай дуьшуьшра и кардин себеб  линия­дал авария жедай гьалар арадал атун тир. Ихьтин гьалар, адет яз,  агьалийрин кIвалера авай ва я иеси авачир 0,4 кВ-дин линийрал ва трансформаторрин подстанцийрал  жезва. Вучиз лагьайтIа, гзаф вахтара подстанцияр,  электротадаракар тайинарунин къайдайрал (ПУЭ) амал тавуна, гъилик квай материалрикай, энергетикар тушир ксари эцигзава. Идалайни гъейри, абуруз  лазим къайдада къуллугъ авун таъминарзавач, нетижада  и карди акьалтIай четин  гьалар арадал атунал гъизва.

КьетIендаказ къейд ийиз кIанзава хьи, электрикдин линия 50 йис идалай вилик тухванвайди я. Адан яргъивили 20,5 километр тешкилзава, 8,85 км агьалийринбур я. Иеси авачир ва агьалийрин линияр асул гьисабдай  цIийи участокра (микрорайонра) ава.

И месэлади вичив бинедилай эгечIун истемишзава. И кар патал цIийи микрорайонриз электричество туху­дайла­, технический вири истемишунрал амал авуна, алава­ тир трансформаторрин цIийи подстанцияр эцигна кIан­да, яни хуьрерин агьалийрин кьадар гзаф хьунихъ га­лаз алакъалу яз, электросетарни кутугайвал туь­кIуь­рун, абур алай аямдин истемишунриз жаваб гудайбур авун лазим я. Федеральный закондин (ФЗ№131) бинедаллаз, и месэла хуьрер электрикламишунал маш­гъул­ тир чкадин самоуправленидин органрин  хиве ава”.

М.Гитинасулова  гайи жавабдай малум жезвайвал, хуьрерин мулкара электрикдин линияр къайдада ва   трансформаторрин подстанцияр  лазим кьадарда  хьун чкадин  администрацийрилай  аслу я.

«Лезги газет»


Всего просмотров: 74

Читайте также: