Самурдин тамун къерехар михьна

“РусГидро” компаниядин Да­гъустандин филиалди республикадин виридалайни гуьзел чкайра  къайда тунин кIвалах давамарзава. ИкI, карханади экология хуьнин макьсаддалди тешкилзавай “оБЕРЕГАй” серенжем нубатдин сеферда Самурдин тама – Дагъустан Рес­публикадин Мегьарамдхуьруьн райондин мулкунал алай Самур ва Гъве­чIи Самур вацIарин къерехра экъечIна­вай  юкьван гьалдин субтропикриндаз ухшар сармашухдин надир тама кьиле фена. 

Са патахъай там Каспий гьуьлуьн къерехдив агакьзава. Тама 1000-далай гзаф жуь­рей­рин набататар гьалтзава, гьа гьисабдай яз,  Яру Ктабда тунвайбурни.

ДГУ-дин экологиядин ва дурумлудаказ виликди финин Институтдин студентрикай, “РусГидродин” Да­­­гъустандин филиалдин ва РД-дин тIебиатдин ресурсрин ва эколо­гиядин министерстводин къуллугъчийрикай ибарат экодесантди и сеферда  “оБЕРЕГАй” серенжем  гьар йисан 26-сентябрдиз кьиле физвай  Виридуьньядин “Планета зирзибилдикай хуьн” серенжемдин сер­гьятра­ аваз тешкилна. Лагьана кIан­да хьи, гьеле 25 йис идалай вилик сифте яз башламишай ва океандин пляжар михьи авунин макьсаддалди Австралиядин агьалияр кIватIал авур и серенжем виридуьньядин де­режа­диндав агакьнава ва алай вахтунда ана гьар жуьре уьлквейрай тир миллионралди гуьгьуьллубуру иштиракзава.

Самурдин там вичихъ тешпигь авачирди ва тIебиат хуьнин жигьетдай кьетIен дережа­динди ятIани (там государстводин тIеби­атдин “Самурский” заказникдик ква), яша­йиш­да арадал къвезвай  зирзибилралди ва амукьайралди тIебиат чиркинарунин месэла инани хциди я. Там тирвал ва цин къерехра плас­тикдин бутылкаяр, пакетар, садра ишле­миш­дай къапар гадарнава. Энергетикри ва студентри гатуз чкадин агьалийри ва туристри ял язавай тамун са чIук ва адан патав гвай Каспий гьуьлуьн къерех зирзибилдикай михьна. Санлай къачурла, абуру 140 шешел зирзибил кIватIна.

Кьве гьафте идалай вилик “РусГидро” компаниядин Дагъустандин филиалди  “оБЕРЕГАй” серенжем Дубки поселокдин патав гвай тама кьиле тухванай. Дагъустанвийри ва республикадин мугьманри рикI алаз ял ядай и чкайдай 120 шешел зирзибил кIватIнай.

Экология хуьн патал тешкилнавай федеральный дережадин мергьяматлувилин “оБЕРЕГАй” серенжем “РусГидро” ПАО-дин экологиядин сиясат уьмуьрдиз куьчуьрмишунин сергьятра аваз кьиле тухуз им 14 лагьай йис я.  Серенжемдин макьсад  тIебиатдив мукъаятдаказ эгечIунин, адал рикI хьунин, эко­логия хуьнин гьиссер арадал гъун я ла­гьайтIа жеда. Серенжемда вири Россиядай тир агъзурралди аялри, жаванри ва чIехибуру иштиракзава.­

Чи мухбир


Всего просмотров: 34

Читайте также: