Сагърай лугьузва!

Гьуьрметлу “Лезги  газетдин”  редакция!

Гьуьрметлу профессор   Замир   Закарияев!

Чи кIвализ “Лезги газетдин” нубатдин 4-нумра хтайла, заз адан чинилай зи ата-бубайрикай кхьенвай “Диндин рекьяй алимар хьайи ялахъвияр (шейх Исмаил эфенди ва гьажи Ибрагьим эфенди)” макъала акуна. Зи рикIик къалабулух акатна, вучиз лагьайтIа чаз чи бубайрикай малуматар тIимил чизва. Себебни ам я хьи, зи буба  Мегьамед-Ялахъви, вичин буба Исмаил кечмиш хьайила, лап чагъ аял тир. Ам вичин тахай бубадихъ галаз Мегьарамдхуьруьз атайди, гьана амукьна. А вахтунда адан чIехи буба гьажи Ибрагьим эфендидал чан аламай. Ада Мегьарамдхуьре мектебни ачухналдай. Идакай чаз чи мума гьажи-Салигьата лагьанай (рагьметар гуй вичиз).

Гьажи Ибрагьим эфендидиз кьве хва хьана: Исмаил ва Халил. Халилаз са хва — Агьмед хьана. Ам Худата яшамиш жезвай. Ахпа, яшар хьайила, зи ими кечмиш хьана.

Исмаила, Стамбулдин университет куьтягьна, СтIалдал тарсар гузвай. Адан га­да Мегьамед зи дах я. Мегьамедаз алай вахтунда Мегьарамдхуьре яшамиш жезвай, бубайрин тIварар алай кьве хва ава: Исмаил ва Ибрагьим.

Заз ван атайвал, Исмаилни Халил лап жегьилзамаз рагьметдиз финин себеб гуя бубади абуруз, партийнияр хьана лугьуз, къаргъишар авун хьаналда. Якъин гьикI ятIа чидач, амма Урусатда Халил ва инани Исмаил, гьардаз са хва аваз, кечмиш хьана.

Чун Ялахъиз бубадин, яни шейх Исмаил эфендидин пIирелни физва. Хуьре гьа куьне лугьузвай бубадин кIвалер­ни ама.

Заз, гьуьрметлу профессор Замир Закарияев, зегьмет чIугуна, и делилар жа­гъурна, раиж авур квез чи вири тухум­дин ва зи патай рикIин сидкьидай  чухсагъул лугьуз кIанзава. Къуй квехъ чандин сагъвал, кIвалахда мадни еке агалкьунар хьурай.

Гьуьрметдалди, гьажи Ибрагьим эфендидин птул, Ярагъ-Къазмайрин юкьван школадин муаллим  Мегьамедрагьимова   (Исмаилова)   Севиля.

Гьуьрметлу редакция, за чи багъри хуьруьз бахшнавай са шиирни ракъурзава:

Замир Закарияев

Ялахъар

Бубадин хуьр, хайи Ватан,

А гуьзел тир чил баркаван,

КIекIецдалди абукевсер

Яд багъишай бубад гъилер.

 

Ялахърин хуьр, чи гуьнеяр,

Вилиз такваз чи бинеяр,

ПIирер макан ва гьуьжреяр, —

Алад аниз — квез шегьре я!

 

ПIирерикай рахаз вун къе,

Уьзягъ яни вун, чан Бике,

Тухуз тахьай веси кьилиз?

Жезвач вавай са дуьа кIелиз,

Хъфена хьиз хайи хуьруьз…


Всего просмотров: 75

Читайте также: