Са нефесдаллаз килигна

19-февралдиз Кьасумхуьрел, администрациядин дараматдин заседанийрин залда, машгьур тележурналист  Гулера  Камиловади  гьазурнавай, Дагъларин уьлкведа ва адалай къецени машгьур Алкадар­скийрин тухумдиз бахшнавай “Созвездие Алкадари” документальный фильмдин презентация кьиле фена.

Ана райондин кьил Нариман Абдулмуталибова, райадминистрацияда жавабдар къуллугърал алай ксари, яратмишдай интеллигенциядин ва массовый информациядин такьатрин векилри, муаллимри, чIехи классра кIелзавайбуру, Гьасан эфендидин тухумдин векилри иштиракна.

РАН-дин академик, философиядин илимрин доктор Абдусалам Гьуьсейнован 80 ва Сулейман-Стальский райондин 90 йис тамам хьуниз бахшнавай “Созвездие Алкадари” фильмдин сифте презентация алатай йисан 17-майдиз Махачкъалада, Расул Гьамзатован тIварунихъ галай Милли библиотекада кьиле фенай. Ана чи райондин векилрини иштиракнай.

Фильм гьазурунин теклиф гайиди Сулейман-Стальский райондин кьил Нариман Абдулмуталибов, спонсорвал авурди чи халкьдин баркаллу хва Имам Яралиеван мергьяматлувилин “Умуд” фонд я. Проектдин съемкаяр Москвада, Махачкъалада, Дербентда, Кьасумхуьрел, Вини Алкьвадрал, ЦIийи Алкь­вадрал ва куьгьне Хпуьхъа кьиле фена.

Презентациядиз атанвайбур сифте 45 де­кьикьада давам хьайи «Созвездие Алкадари» фильмдиз килигна. Тамашачийри Гулера Камиловадиз, фильм арадал атуник­ еке пай кутунай Имам Яралиеваз ва Нариман Абдулмуталибоваз сагърай лагьана.

Мярекат тухузвайди тир Нариман Абдулмуталибова сифте гаф проектдин автордиз гана.

— Гьуьрметлу СтIал Сулейманан райондин агьалияр! — лагьана Гулера Камиловади. — Фильм арадал атуникай рахайтIа, за проектдал тамам 3 вацра кIвалахна, документар, ктабар, архивра, гъилин кхьинрин фондара авай материалар тупIалай авуна, Алкьвадар Гьасан эфендидин уьмуьрдин ва яратмишунрин рекьихъ, ирсинихъ галаз таниш хьана. Зун гъавурда акьуна хьи, Дагъларин уьлкведин тарихда чаз хабар авачир чинар гзаф ава. Гьи­кьван камаллу, бажарагълу, жуьрэтлу ксар яшамиш хьана Дагъустандин хуьрера! Абурухъ акьван зурба къуватар, мумкинвилер авай хьи, гьатта са шумуд несилар патални девлетлу ирс туна. ИкI, Алкадарскийрин тухумдин гьар са векилдикай кьилдин тамам са ктаб кхьиз жеда. Алкьвадар Гьасан эфендидин яратмишунрин ирс, уьмуьрдин рехъ тамамвилелди ахтармишнава лугьуз жедач. Абур чирун, ахтармишун, абурукай делилар гележегдин несилрал агакьарун чи баржи я. И кар патал чна зегьметни чIугвада.

Нариман Абдулмуталибова ихьтин надир фильм гьазурунай Гулера Камиловадиз сагърай лагьана, фильм арадал гъунин макьсаддикай, Алкадарскийрин тухумдин векилрин алакьунрикай, кьетIен бажарагъдикай метлеблу рахунар авуна, итижлу мисалар гъана.

— Лезги халкьдин дамах тир Алкадарскийрин тухум неинки са фильм, проект арадал гъуниз, гьакI шумудни са фильм гьа­зу­ру­низ лайихлу я, — къейдна Нариман Абдул­муталибова. — Къе чун фильмдиз са нефесдал алаз килигна, ам республикада ва вири Россияда кьиле тухудай конкурсра иштиракуниз лайихлу я. Гьакъикъатдани, Алкадарскийрин тухумди Ватандиз 20-далай виниз илимрин докторарни кандидатар, РАН-дин гьакъикъи член, Социализмдин Зегьметдин Игит, Ленинан, Дуствилин орденрин 6 кавалер гана. Кьве гимидал Готфрид ва Генрих Гьасановрин — Алкьвадар Гьасан эфендидин хтулрин тIварар ала. Алкадарскийрин тухумда образованидин, хуьруьн майишатдин, ме­дицина­дин ва маса хилерай тIварар къачунвай гзаф ксар ава. Гьавиляй заз инанмишвал ийиз кIан­зава хьи, Гулера Камиловади и проект давамарда, цIийи фильмаяр гьазур хъийида. Чун и карда адаз куьмек гуз гьазур я.

Тебрикдин келимайрилай гуьгъуьниз ­Нариман Абдулмуталибова Гулера Ками­ловадиз Сулейман-Стальский райондин 90 йис тамам хьунихъ галаз алакъалу яз акъуд­навай “Край мыслителей и поэтов” ктаб, махсус конверт ва цуькверин кIунчI багъишна.

Мярекатдал Алкьвадар Гьасан эфендидин музейдин директор Гьуьсейн Гьуьсейнов, Дагъустандин халкьдин шаир, райондин культурадин отделдин начальник Майрудин Бабаханов, шаир Абидин Камилов ва Кьасумхуьруьн 1-нумрадин юкьван школадин ученик Къурбан Алимирзоев рахана, абуру фильмдикай чпин фикирар раижна.

Мярекатдилай гуьгъуьниз Нариман Абдулмуталибов, Гулера Камилова, Махач­къа­­ладай атанвай мугьманар Алкьвадар Гьасан эфендидин музейдиз фена.

Хазран  Кьасумов


Всего просмотров: 104
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире