С.М. Сейфединов

Коронавирусдин тIугъвал себеб яз малумарай карантиндин, саки вири кIвалера, начагъбур больницайра авай вахтунда ватанэгьлийрин рикI тIардай, перишан ийидай дуьшуьшар, кьиникьарни арадал атана. Милли искусствода, образованида, ме­ди­ци­нада зегьмет чIугвазвай, халкь­дин арада гьуьрмет къазанмишнавай хейлин инсанар рагьметдиз фена. Гьа и йикъара мад са чIулав хабар: вичихъ кье­тIен бажарагъ авай, гзаф кьадар суьретрин, портретрин сагьиб, устадлу художник Сейфединов Сейфедин Мигьиядин хвани залан азарди чавай къакъудна.

С. Сейфединов 1952-йисуз КцIар райондин Манкъулидхуьре дидедиз хьана. Ина юкьван школа акьалтIарна, художест­венный училищеда кIелна, ахпа ада армиядин жергейра къуллугъна. Гуьгъуьнлай Тифлисда ху­дожественный академияда кIелун давамарна. 1982-йисалай Да­гъустандин художникрин Союзда кIвалахна. Вири и йисара мил­ли тIебиатдал, хайи макандал ва инсанрал рикI алай кас датIана яратмишунрал машгъул хьана. Ада республикадин, зонайрин ва Вирироссиядин са жерге выставкайра иштиракна.

Гьеле аял вахтарилай, гъиле­ карандаш кьаз чир хьайи чIа­ва­лай, элкъвена кьунвай тIебиат­диз, инсанрин амалриз, къаматриз килигзавай, фикир гузвай гада, сейли художник хьайилани, рангаринни, экверинни хъенрин ажайиб алем ачухарунин ре­кьера гьа са жуьредин, гзафбуруз малум къайдайрал акъвазнач. Ам анжах вичин цIийи жи­гъир­рихъ, рекьерихъ къекъвена. Лу­гьун хьи, ада ихьтин илим вичин баде Зарбафавай, гамар храдай пара устадлу устIар­ди­вай чирна.

Сейфедин Сейфединова чи гуьзел чкайрин, дагъларин, дерейрин, хуьрерин, милли тарихдихъ галаз алакъалу игитрин ва халкьдин арада машгьур ватанэгьлийрин портретар чIугунва. Ада чи игитвилин “Шарвили” эпосдин суьретар чIугуна. Художникдин гзаф кьадар яратмишунар чи ва маса уьлквейрин музейра, галереяйра, кьилдин ксарин кIвалера ава.

2004-йисуз бажарагълу устаддиз Дагъустан Республикадин лайихлу художник лагьай тIвар гана.

Художникди эхиримжи йи­къал­ди вичин мастерскойда яратмишзавай. Къуй рагьмет жагъурай вичиз. Хайи халкьдин милли суьретрин искусство вилик тухун патал ара датIана зегьмет чIугур Сейфедин Сейфединов чи рикIера амукьда.

“Лезги газетдин” коллективди художникдин хизандиз,

ам чидай кьван виридаз башсагълугъвал гузва.


Всего просмотров: 65
Подпишитесь на наши каналы:

Читайте также:


Новости партнеров