Рухунар

Рухунрин хуьр Куьре пата дагъдин ценерив гвай ЯркIи хуьрерикай сад я. Ам Сулейман-Стальский райондик акатзава. Рухунрин хуьруьн тарих ва адан бине эцигай вахт тайин туш. Са бязи делилриз килигайла, хуьр 17 асирдин юкьвара арадиз атун мумкин я.

Яшлу ксарин лугьунриз килигна, хуьр са шумуд тухумдикай ибарат тир: ГъарачIар, Шамхалар, Мигьядар, Макьар, Самурхаяр, Пепеяр, Бакьашар, Къазияр, Агьмадар. Заз жагъай делилрал аслу яз, Самурхайрин тухум бинелуяр яз аквазва. ГъарачIар, Шамхалар, Мигьядар (ибур пуд стха) Ахцегь райондин Чеперин хуьряй, Макьар ла­гьайтIа, виликан Кьасумхуьрин рай­ондин Агъа Макьарин хуьряй, Агьмадар Лак райондин Хосрех хуьряй атана. Хуьрел гьардаз вичин тухумдин тIвар эцигиз кIан хьана ва гзаф гьуьжетар, рахунар арадал атана. Патавай физвай са мугьмандиз и агьвалат акуна ва кардин гъавурда акьур ада лагьана:

– Хуьруьн тIвар эцигун патал куь арада гзаф рахунар кьиле физва, гьакI хьайила за квез хуьруьн тIварни “Рахунар” эцигун меслят къалурзава.

Гележегда Рахунрикай Рухун тIвар арадиз атана.

1886-йисуз тухвай переписдин делилралди, а чIавуз ина 78 хизан яшамиш жезвай. Ватандин ЧIехи дяве башламишайла хуьряй 87 кас фронтдиз фена, абурукай 42 кас телеф хьана.

1966-йисуз залзала хьуникди и дередин гзаф маса хуьрер хьиз, чи хуьрни ЦIийи Макьарал куьч хьана­.

Магьшур хуьруьнвийрикай Рухун Алидин, Куьре округдин алимрикай сад Рухунай тир гьуьрметлу Али-эфенди гьажидин тIварар кьаз жеда. Рухун Алидин хтул Мегьамедэфендиди Ясная Полянада Н.Толстоян кIвале къуллугъна. Ам аниз къандиз акъуднай.

Советрин девирда Бабаханов Селима Дагъустандин Огни поселокда шуьше цIурурдай заводдин директорвиле, 1973-1981-йисара КПСС-дин Дербент шегьердин сад лагьай секретарвиле, 1981-йисуз обкомдин са аппаратда отделдин заведующийвиле, ахпа респуб­ли­кадин недай-хъвадай шейэрин промышленностин министрвиле кIва­лахна. Адан гада Бабаханов Мегьа­мед Юждаг институтдин проектор я. Чи хуьруьнви Алиев Тегъиди 1939-1950-йисара Сумгаит шегьердин ми­лициядин начальниквиле кIва­лахна. Ам Яру Пайдах ордендиз лайихлу хьана. Илимдин рекье вичин бажарагълувал къалурайбурун арадай яз Дагъустандин университетда “Гражданское Право” факультетдин доцент, юридический илимрин кандидат, Дагъустан Республикадин лайихлу юрист тIвар­цIин сагьиб – Рустамова (Мегьамедова) Светлана Мавлудовнадин тIвар кьаз жеда. Къазимегьамедов Рамидин армспортдай 2 сеферда   дуьньядин чемпион хьана.

Алай девирда Рухунрин хуьруьн жемят маса са шумуд хуьруьхъ галаз ЦIийи Макьарал яшамиш жезва. Рухунрин куьгьне хуьр и дереда авай гзаф маса хуьрер хьиз, хара­пIайриз элкъвенва. Хуьруьхъ рикI кузвай хуьруьнвиярни галаз, зун ам арадал хкунал машгъул я. Заз кас амачир  хуьрер арадиз хкведайдак умуд кутаз кIан­зава.

Агьмад Магьмудов


Всего просмотров: 14

Читайте также: