Руьгь тухардай эсерар

Дидед чIалал чапзавай литературно-художественный ва общественно-политический “Самур” журналдин  4-нумра акъатнава. Лугьун лазим я хьи, ана кIел­­­дай итижлу, руьгь тухардай жуьреба-жуьре  жанрайрин эсерар ава.

Сифте нубатда Дагъустандин халкьдин шаир Ханбиче Хаметовадин “Намусдин къаябар” драма­ къейдиз кIанзава. Гъве­чIи эсерда зурба темадиз экв ганва. Руьгьдин, халкьдин азадвал къа­зан­ми­шун, хуьн патал къагь­ри­ман рухваяр, уьтквем ри­кIер, женгчияр герек я. Къванцин гададиз, Кьуьчхуьр Саидаз, Етим Эми­наз, Анхил Мариназ, СтIал Саядаз, Омарла Батыраяз, СтIал Сулейманаз, Къа­зи­ме­гьамед Агъасиеваз ва ихьтин масабуруз  ухшамишбур.

Дагъустандин халкьдин писатель  Абдуселим Исмаилован кьуд пердедикай  ибарат “Мегьрибан” къемедада  хъуьруьналди, зарафатдалди, айгьамдалди алай аямдин инсанрин кьуьруькар, синихар, гунагьар къалурзава. Сюжетда уьмуьрдин юл­даш рагьметдиз фенвай дидедиз рушани езнеди гъуьл жа-гъурун патал туькIуьрнавай фенд ава…

Нумрада писатель Нариман Ибрагьимован “Зегьерлу кьисас” повесть давамарзава. Эсердин кьилин игит силисчи Гьабиб пуд дуст са йифиз кьейи сирлу тахсиркарвиляй кьил акъудиз алахъзава.

Алим, писатель Къурбан Акимован “Зарафатдинни русвагьдин эсеррин шагь” макъала шаир-сатирик  Жамидинан 85 йисан юбилейдиз бахшнава. Нум­рада шаирдин “Рехивал” поэма-хкетни чапнава.

Мансур Куьревиди Етим Эминан “Гуьзел Тамум” шиирдин — гъезелдин кIан-пун  ахтармишзава, ам кьве-кьве цIарцIи­кай, бейтиникай ибарат тирди тестикьарзава ва гъезелдин цIийи кьве цIарцIин вариантни гузва.

Публицист Гьажи Ильясова тIвар-ван авай художник Сейфедин Сейфединован уьмуьрдай къачунвай итижлу вакъиаярни, рагьметлу писатель Тажидин Агьмедханован “Ажеб тарс гана” юморескани хушдиз кIе­лиз жедайбур я.

Абад Азадов


Всего просмотров: 46

Читайте также: