РикIера амукьда

Ватандин ЧIехи дяведин ва­къи­­аяр къвер­давай тарихда гьатунихъ галаз сад хьиз виридалайни гзаф ивияр экъичай и дя­ведин иш­ти­ракчийрин кьадарни тIимил жезва­.

Алай йисан 12-июлдиз чи арадай Ватандин ЧIехи дяведин къати женгерин шагьид хьайи Гьалим Агъаметович Къурбановни акъатна­.

Ам 1920-йисан 24-февралдиз Рутул райондин Кичерин хуьре дидедиз хьана. 1942-йисан мартдин вацра дагъвидиз Яру Армиядин жергейриз эвер гана. Гуржистандин Гори шегьерда ада дяведин рекьяй­ сифтегьан гьазурвилер къачуна.

Кьисметди Гьалим Къурбанов Украинадин 3-фронтдин разведкадин кьушунриз акъудна. Дирибаш дагъви квай кьушунри Николаевский, Запорожский, Херсонский областра душмандиз акси женгера иштиракна.

1943-йис Гьалим Къурбанов патал четинди тир. Адал Мелитополдин районда кьиле фейи са женгина сифте яз хер хьана. Госпиталда сагъламвал мягькемар хъувурдалай кьулухъ рикIе Ватан азад авунин къаст авай ам мад фронтдиз хъфена.

Гьалим Къурбанова Украина азад авунин женгера иштиракна. Вири Ев­ропа кIвачикна, ам Германиядиз кьван фена. И хаталу рекьера низ чи­­­да баркаллу дагъвиди гьикьван четинвилериз дурум ганатIа, шумуд се­ферда адан уьмуьрдин гъал кьатI жедай чкадал атанатIа! Аллагьди хвена.

1946-йисуз Гьалим Къурбанов хайи хуьруьз хтана. Амма тек­диз ваъ, урус медсестра, фронтдин иштиракчи Фаина Митрофановнани галаз. Ада Ру­тул райондин дагълух хуьре, вафалу кайвани, къайгъудар диде яз, кIва­лин къулни хвена, кьегьал веледарни чIехи авуна. Идалай гъейри, ме­дицинадин рекьяй ада чкадин агьалийриз гайи кьван куьмекрин гьахъ-гьи­саб екеди я. Фаи­на Митрофановнадин экуь къамат рутулвийрин рикIера эбеди я.

Женгера къалурай дирибашвиляй Гьалим Къурбанов Ватандин  дяведин ордендиз, женгинин ва зегьметдин хейлин медалриз, Иосиф Сталинан патай Чухсагъулдин чарчиз лайихлу хьана.­

Дяведин ветеранди хайи район ва хуьр яшайишдинни экономикадин рекьерай вилик финик кьетIен пай кутуна. Ам мукьвал-мукьвал мектебда кIелзавай аялрихъ, райондин жегьилрихъ галаз гуьруьшмиш жедай, акьалт­завай несилриз ватанпересвилин тербия гунин серенжемра активнидаказ иштиракдай.

Гьалим Агъаметович къени къилихрин, агъайна, низам-къайда кIандай, гьарайдиз гьай лугьудай заха инсан тир. Гьахьтинди яз ам мукьва-кьилийрин, ватанэгьлийрин рикIерани эбеди амукьда.

Гьалим Агъаметович Къурбанов рагьметдиз финихъ галаз ала­къалу яз, чна адан хизанриз, багърийриз башсагълугъвал гузва.

Гьасангьуьсейн Абдулжелилов,
жегьилрин ватанпересвилин “Ватан хуьзвайди” клубдин регьбер


Всего просмотров: 26

Читайте также: