“РикIел хуьнин шем”

Пудкъанни цIекIуьд йис идалай вилик, 1941-йисан 22-июндиз, фашистрин Германияди Советрин гьукуматдал гьужум авуникди, Ватандин ЧIехи дяве гатIунна. 1941-1945-йисара халкь гзаф четинвилера, цIаярани женгера гьатнай…

Дяве алатнаватIани, а йисара душмандин хура акъвазай ва Ватан патал чпин чанар гайи аскерар чна рикIелай ракъурзавач. И вакъиа себеб яз, 22-июндиз вири уьлкведа «РикIел хуьнин шем» лишандик кваз серенжем кьиле фена. Дагъустандин вилик-кьилик квай районрикай сад тир Сулейман-Стальский райондани Ватандин ЧIехи дяведа иштирак авурбуруз бахшнавай жуьреба-жуьре мярекатар, акциярни флешмобар кьиле фена. ИкI, Испикрин медениятдин кIвалин къуллугъчиярни кьулухъ галамукьнач. 22-июндиз Испикрин КДЦ-дин директор Лазер Шихбабаева, Афгъанистандин ветеранрин Союздин председатель Ислеман Ризаева, Афгъанистандин вакъиайрин иштиракчи Тагьирбег Мусаева, агъсакъалрин совет Шихагьмед Шихагьмедова ва хуьруьн ктабханадин къуллугъчи Шапери Ризаевади дяведин иштиракчийриз хкажнавай гуьмбетдал цуьквер эцигна.

Къейд ийин, Испикрин хуьряй 80 кас дяведиз фена. Абурукай 50 аскер, гьайиф хьи, дяведин къияматди телефна. Анжах 30 касдиз ватандиз хкведай кьисмет хьана. Ватан патал чанар гайибурни, гъалибвал гваз хтайбурни чна гьамишалугъ яз рикIера хуьн лазим я. И кар гьар са къанажагълу инсанди вичин буржи хьиз гьиссна кIанда.

Жемиля  Ризаева


Всего просмотров: 62
Подпишитесь на наши каналы:

Читайте также:


Новости партнеров