РикIе Ватан аваз…

Дуьньядин гзаф уьлквейра хьиз, лезгияр Украинадани яшамиш жезва. 2012-йисуз чна газетдай Харьковда, Луганскда ва и уьлкведин маса шегьерра жуьреба-жуьре къуллугъар тамамарзавай са жерге ватанэгьлийрикай хабар ганай. Эхирижи йисара кьиле фейи вакъиайри асирралди дуствилин, стхавилин алакъаяр хвейи Урусатдинни Украинадин араяр къурнаватIани, халкьарин арада авай къени, чими рафтарвилер квахьнавач. ИкI тирди заз мукьвара интернетдин куьмекдалди Харьковдин областдин эцигунардай технологийрай пе­шекарвилин образование гудай региондин центрадин директор, чи ватанэгьли  Геннадий  Жа­мал­динович   Амирбеговахъ  галаз кьиле фейи ихтилатрай чир ­хьана.

Ам Бакуда гзаф аялар чIехи жезвай хизанда дидедиз хьана. Ахцегь районда юкьван мектеб акьалтIарай жегьил кьилин образование къачунин макьсадди Украинадиз акъудна. Ингье а вахтар Геннадий Жамалдиновича гьикI рикIел хкизватIа:

— Сад лагьай сеферда завай университетдик экечIиз хьаначир. Зун эцигунринни монтаждин управленида фялевиле кIвалахал акъвазна. Гуьгъуьнлай кьве йисуз армияда къуллугъна. Ватандин вилик буржи тамамарайдалай кьулухъ зун Харьковдин госуниверситетда тарихдин факультетдик экечIна, гьа са вахтунда В.Малышеван тIварунихъ галай заводдани кIвалахиз гатIунна. Университет акьалтIарай 1982-йисалай къенин йикъалди за Украинадин образованидин хиле зегьмет чIугвазва.

Геннадий Жамалдинович Украинадин образованидин отличник я. Адаз гьар са карда низам-къайда хьана кIанда. Вичин кIва­лахдани тежрибалу пешекарди и кардиз кьетIен фикир гузва. Гьавиляй адаз санал кIвалах­завай юлдашрин арада еке гьуьрметни ава.

Чи ватанэгьлиди регьбервал гузвай центрадикай рахайтIа, ам областда сейлибурукай сад я. Ина жуьреба-жуьре рекьерай пешекарар гьазурзава. Мисал яз, сварщикар, машинар хъийидай ус­тIа­рар, операторар, цлар эцигдайбур, дерлекар ва масабур.

КIвалахдикай азад вахт Геннадий Жамалдиновича хизандин юкьва акъудзава

“Уьмуьрда зи кьилин муаллимар бубани диде я. Абурун меслятрал за къенин юкъузни амалзава. Жув агакьнавай дережаярни сифте нубатда гьабурун зегьметдин, тербиядин нетижаяр я. ГьикI абуру зун зегьметдал рикI алаз чIехи авунатIа, за жуван веледризни гьа къайдада тербия гана. Хизан инсандин уьмуьрда виридалайни важиблу я. Гьавиляй за жуван азад декьикьаяр хизандин арада, веледрихъни хтулрихъ галаз санал акъудзава”, — лугьузва Геннадий Жамалдино­вича.

Украинада яшамиш жезвай чи ватанэгьлийрин гьал-агьвалдикай рахадайла, Г.Амирбегова къейд авурвал, ана лезгийриз садани са жуьрединни манийвилер гузвач. Виликдай хьиз, исятдани къецепатан уьлкведа авай чи стхайри, вахари карчияр, духтурар, муаллимар… яз кIвалахзава, чпин хизанар хуьзва, бубайрин ватандихъ галаз алакъаяр квадарзавач. “Гъурбатда аватIани, чи рикIе ватан ава”, — лугьузва ада.

Геннадий Жамалдиновича вич бахтлу инсан яз гьисабзава.

— Туьркерин шаир Надым Хикмета лагьанай: “Ашкъидалди ­кIва­лахал физвай ва шадвилелди кIвализ хквезвай инсан бахтлу кас я”. Закайни гьа икI лугьуз же­да, — тестикьарзава чи ватанэгьлиди.

Агьмед Магьмудов


Всего просмотров: 128

Читайте также: