Мергем

РикIе хуьда

Чи диде, Шабанан руш Мергем, дяведин ва адалай гуьгъуьнин йисара колхоздин доярка тир. Ада гьар йисуз ирид виш зегьметдин йикъар къазанмишзавай, шикилни гьуьрметдин кьулунал алай. Ам колхоздин правленидин член, райсоветдин депутат, суддин заседателни тир. Ада 1943-йисуз оборонадиз куьмек яз пуд агъзур манат пул, аскерриз сун гуьлуьтар, бегьлеяр, суьрсетдин посылкаяр рекье тунай. Чи дидедин кьве стха Агьмед — 1922, Алибег 1925-йисуз Рутул райондин Хъуьлуьдрин хуьре лап кесиб хизанда дидедиз хьана.

Гъве­чIизамаз етим хьайи абуру сифте детдомда, ахпа Рутулрин интернатда тербия къачуз, Эскендеров Гьажидихъ, Ширинбегов Рамазанахъ, Акимов Салигьахъ галаз санал школада кIелза­вай. Лап хъсан кIелзавай аялрин жергеда сифте чкадал Алибеган тIвар авай. Ам гьакIни художникдин пешедал гзаф кьару тир. Адан парчадал чIугунвай Ленинанни Сталинан шикилри районда кьиле фейи конкурсда гьалибвал къазанмишнай. Юхсул гьалда авай адаз пишкеш яз кIва­челай кьилелди алукIдай пек-партал ганай.

Алибег

Хъсан кIелзавай аялрин жергеда авай Алибег гьуьрметдин грамотадиз лайихлу хьанай. А йисара ада хъсан гьикаяярни кхьенай. Адан художниквилин агалкьунрикай хабар са куьруь вахтунда вири райондиз чкIана. Жаван устадди ягъай шикилар райондин центрадал аквадай чкадал куьрсарна. ЧIехи стха Агьмеда лагьайтIа, тарсарилай гуьгъуьниз гьамиша ктабар, журналар, газетар кIелдай. Адаз урус чIални лап хъсандиз чидай. Агьмедахъ кIелун давамардай, Алибегахъни писатель-ху­дожник жедай фикирар авай. Амма абур чпин мурадрив агакьнач.

Комсомолдин членар тир Агьмедни Алибег Шабановар 1942-йисуз гуьгьуьллувилелди фронтдиз фена. Чав абурун патай са чар-цIарни агакьначир. Са йисалай кьведни фронтда телеф хьана лагьай чIулав хабар хтана. Амма кьве стхани дяведа телеф хьанатIани, чи дидеди вичин рикIин зайифвал садазни къалурнач. Дуьньядик са пайни тахьай абурун тIварар игитвилелди кьейи аскеррин сиягьда гьатнава. Агьмед Ростов областдин Густафель лугьудай чкада кучукнава. Алибег гел га­лачиз квахьна. Архиврай санайни адаз талукь тир малуматар жагъур хъийиз хьанач.

Къуй чилерал мад дявеяр тахьурай! Чи балайрин, къвезмай несилрин кьилел дуьнья ислягь хьурай!

С-А. Абдурашидов, Хъуьлуьд


Всего просмотров: 62
Подпишитесь на наши каналы:

Читайте также:


Новости партнеров