РДЦ-да цIийивилер

Дагъустандин здравоохраненидин министерстводи республикадин медицинадин идарайрин материально-технический база хъсанарунин кIвалах давамарзава. ИкI, еке дегишвилер республикадин диагностический центрадани (РДЦ) кьиле фенва. Агьалийрин, азарлуйрин гьал виниз тир дережада аваз ахтармишун патал  иниз алай аямдин тадаракар маса къачунва.

ЦIийи тадаракрикай кьилинбурук МРТ-дин (магнитно-резонансный томограф) аппарат (ада 200 кг-дал къведалди заланвал авай ксаризни чпин сагъламвилин гьал ахатармишдай мумкинвал гузва), мультиспиральный компьютерный томограф ва рекъемрин флюорограф акатзава. Багьа тадаракар эцигнавай рентгенологиядин отделенида капитальнидаказ ремонтар авунва.

“Алай аямдин аппаратар ишлемишуни республикадин агьалияр патал медицинадин къуллугърин ери хъсанардай ва диагностикадин четин ахтармишунрин менфятлувал хкаждай мумкинвал гуда. ЦIийи аппаратрал пациентривай чпин сагъламвилин гьал пулсуздаказ ахтармишиз жеда. Герекзавайди анжах духтурдин направление я”, — къейдзава РД-дин здравоохраненидин министр Жамалудин Гьажиибрагьимова.

Алай вахтунда тадаракри кIва­лах тестдин къайдада кьиле тухузва. Амма лап и мукьвара абур та­мамвилелди, пуд сменада кардик акатда. Исятда медперсоналди махсус чирвилер къачуз­ва­.

ЦIийи ва багьа тадаракар маса къачунилай гъейри, медицинадин и идарада вахт кьенятдай технологиярни кардик кутазва. Им лагьай чIал я хьи, ина, виликдай хьиз, яргъи учирар амукьдач. Эгер виликдай ре­гистратурада са шумуд сятдалди акъва­­зун лазим къвезвайтIа, гила и вахтунин кьадар 48 декьикьадилай тIимил, ви­ликамаз учир кьунвай пациентар патал 6-7 декьикьа я. И цIийивилериз центрадиз къвезвайбурулай къимет гуз алакьнава.

Къейд авун лазим я хьи, РДЦ-да гьар йисуз 200 агъзурдалай виниз агьалийри чпин сагъламвилин гьал ахтармишзава. Идахъ галаз сад хьиз, медицинадин и идарада электронный къайдадин регистратура тамамвилелди кардик кутунва, духтуррин кIвалахдин чкаяр автоматизироватнава, лабораториядин кIва­лах­да еке дегишвилер хьанва ва икI мад.

«Лезги газет»


Всего просмотров: 32
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире