Пуд лагьай сеферда

20-февралдиз Махачкъаладин 61-нумрадин юкьван мектебда Махачкъала ва Каспийск шегьеррин мектебра 6-классра кIелзавай аялрин арада лезги чIалайни эдебиятдай “Лезги газетдин” редакцияди олимпиада кьиле тухвана.

2018-йисалай гатIунна, вири дуьньядин хайи чIаларин йикъаз талукьарна, “Лезги газетдин” редакцияди тешкилзавай олимпиададин макьсад акьалтзавай несилдин арада хайи чIал машгьурун, алакьунар авайбур винел акъудун, жаванрик ватанпересвилин гьиссер кутун, абуруз жуван чIал, милли ме­деният, эдебият кIанарун я.

ЦIинин йисуз олимпиадада шегьеррин 16 мектебдин ученикри лезги чIалайни эдебиятдай чпин чирвилер къалурна. Кьилди къа­чуртIа, шегьеррин аялри тестерин ва орфографияни пунктуация ахтармишунин тапшуругъар тамамарна.

Нетижада 1-чка Махачкъаладин 16-нумрадин мектебдин ученик Максуд Михеева (муаллим — Селми Мирзегьасанова), 2-чка Махачкъа­ладин 38-нумрадин гимназиядин ученик Саид Эмирханова (муаллим — Алимат­ Ба­ламир­зо­ева), 3-чка Каспийск шегьердин 6-нум­радин мек­тебдин ученица Къизил Агъафендиевади (муаллим — Тамара Алиярова) кьуна.

Гъалиб хьайибуруз «Лезги газетдин» кьилин редактор Мегьамед Ибрагьимова 5, 3, 2, агъзур манатдин кьадарда аваз пулдин пишкешар, грамотаяр, «Лезги газетдин» юбилейдин ктабар гана. Тафаватлу чирвилер къалурай ученикрин муаллимарни «Лезги газетдин» патай чухсагъулдин чараралди къейдна. Вири иштиракчийриз алай девирдин лезги писателрин — Мердали Жалилован, Нариман Ибрагьимован — ктабарни пишкешна.

Олимпиада тешкилунин карда куьмек гунай 61-нумрадин мектебдин кIелунин ва тербиядин рекьяй директордин заместитель Халидин Эльдаровав ва и мектебда лезги чIаланни эдебиятдин тарсар гузвай муаллим, хайи чIаларин МО-дин (методическое объединение) регьбер Марифат Эльдаровадив чухсагъулдин чарар вахкана.

К.Къалажухви


Всего просмотров: 77
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире