Ниятар кьилиз акъатрай

Инсанриз, иллаки жегьилриз, гьар гьихьтин пешедин иеси хьайи­тIани, сифтени-сифте а рекьяй чирвилер ва мукьуф артухардай, кардин гъавурда аваз вини дережадиз экъечIдай гьевес,  ният хьун чарасуз я.

Алай вахтунда Новороссийск шегьерда кIвалах­завай жегьил пешекар Агьмед Бутаевани кIе­лун, чирвилер къачун эвелимжи буржийрикай яз гьисабзава.

Агьмед Мегьамедович Бутаев 1996-йисан 9-февралдиз Кьурагь райондин Ашарин хуьре дидедиз хьана. 11 йис тамам хьайила Дербентдиз куьч хьана ва 2012-йисуз ада шегьерда мектеб куьтягьна. Гьа и йисуз ам рекьерин гьерекатра хатасузвал тешкилунин инженервилин пешедай ДГТУ-дин улакьрин факультетдик экечIна.

Вуз акьалтIарайдалай кьулухъ Новороссийск шегьердиз фе­­на ва Кубандин гьукуматдин тех­­нический университетдин магистратурадин нафтIадинни газдин факультетдик заочнидаказ экечIна. 2019-йисуз нафтIадин ва газдин хиляй магистрвилин дережа къачуна. Гьа са вахтунда, 2016-йисалай эгечIна, “Транснефть” тIвар алай машгьур компанияда технологиядин тадаракар ремонтунин ва абуруз къуллугъунин рекьяй слесарь яз кIва­лахиз хьана. Са йисуз и къул­­лугъдал сифте тежриба кIватIай жегьил пешекардин алакьунар акур руководстводи адакай линейный трубоводчик авуна. 2018-йисал кьван Агьмеда “Транснефть” тешкилатда агалкьунралди зегьмет чIугуна.

2018-йисалай ада нафтIа­дин­ни газдин комплексар,  нафтIа­дин продуктар хуьдай чIехи къапар, гьамбарханаяр арадал гъунал ва эцигунал машгъул Новороссийск шегьерда авай Сербиядин “Велесстрой” тешкилатда кIвалах­зава. Агьмед Бутаева тешкилатда зегьметдин къаравулда акъва­зунин, кьиле тухузвай кIвалах­рин хатасузвилел гуьзчивалунин къул­лугъ тамамарзава.

Кьвед лагьай дипломдай ам кьураматда ва гьуьле нафтни газ арадал акъатунин крар идара авунин рекьяй инженер я. Диплом вахчурдалай кьулухъ ада чирвилер гудай хсуси центрада  технологиядин хиляй хатасузвилин пешекарвални къачуна. КIва­лахни давамариз, центрада пешекарвилин дережани хкажна.

Жегьил пешекар гьар йисуз хайи хуьруьз хквезва, багърийрал кьил чIугвазва.

“Са гьихьтин ятIани метлебдив, вилик эцигнавай макьсаддив агакьун патал жегьил несилри кIе­­луниз, чирвилер къачуниз ма­йил­валун чарасуз я. Чирвилер авай, кьили кIвалахзавай ксариз гьамиша къимет ва кесер жеда. Кьисметдикай виликамаз хабар жедач, гьавиляй ада жув гьиниз акъудайтIани, хайи ериярни багърияр рикIелай ракъур тавун важиблу я”, — лугьузва жегьил пешкарди.

Къуй ам къуллугъдин гурарай вини дережайриз хкаж хьурай!

К.Ферзалиев


Всего просмотров: 92

Читайте также: