Нетижаяр кьуна

Малум тирвал, 2017-йис РФ-дин Президент В.Путинан Указдалди тIебиат хуьнинди яз малумарнай. Адахъ галаз алакъалу яз уьлкведин вири регионра сифте нубатдин серенжемрин, авуна кIанзавай кIвалахрин списокар тестикьарнай, программаяр кьабулнай. РФ-да экологиядин месэлаяр гьялунин макьсаддалди 194 миллиард манатдин такьатар чара авуна, яни экологиядин месэлаяр сифте чкадал эцигна.

Чи республикада 2017-йис Каспийдин ва Дагъустандин цин маса чешмейрин йисни яз малумарнай. Йисан сифтедилай лап важиблубурукай яз къейднай: тIебиатдин ресурсринни экологиядин министерстводи церин чешмеяр дуьзгуьн гьалдиз хкун патал кIвалах тухун, гьуьлуьн кьер михьиз хуьн, ана экологиядин гьалар хъсанарун, туристар желбунин дережа хкажунин мураддалди гьуьлуьз физвай чиркин ятар михьунин кIвалах нетижалуди авун, Каспийскдиз кьван 10-16 километрдин мензилдиз тоннелдин канализациядин коллектор туькIуьрунин кIвалахар акьалтIа­рун ва мсб.

Ингье йис акъатзава, гзаф  чкайра Экологиядин, Каспийдин йисан нетижаяр кьуниз талукьарнавай мярекатар кьиле фена. Махачкъалада лагьайтIа, Шииратдин театрда вечер тухвана. Сад лагьай­ мертебада “Чан алай гьуьл” выставка ачухнавай, кьвед лагьай мертебада республикадин меркездин аялрин филармониядин концерт хьана. Мярекат тешкилайди шегьердин администрация тир. Аниз республикадин министерствойринни ведомствойрин векилриз теклифнавай. Абурун арада авай: тIебии ресурсринни экологиядин министрдин везифаяр вахтуналди тамамарзавай Н.Къарачаев, милли политикадин министрдин везифаяр вахтуналди тамамарзавайди тир Т.Гамалей, культурадин  министрдин заместитель М.Мугадова, Махачкъала шегьердин Собранидин председателдин 1-заместитель П.Аллагьвердиев, художникрин Союздин председатель К.Мегьамедов, музыкантрин Союздин председатель, Россиядин искусствойрин лайихлу деятель, пианист Х.Баширов ва масабур.

Вечер шегьердин кьилин заместитель З.Алхасова ачухна. Ада лагьайвал, Экологиядин йис Махачкъаладин 160 йисан юбилейдал ацалтна. Экологиядин гьалар хъсанарун патал хейлин кIвалахар кьиле тухвана. ИкI, месела, Махачкъа­лада ва адан патарив ихтиярсуздаказ кутунвай 1200-далай гзаф хъуртар тергна, къелемар, кул-кусар ца­на. Ихьтин кIвалахар гележегдани  давамардайвал я.

Аялрини педагогри гьазурнавай выставкади, экспонатри виридан фикир желбзавай. Ана 180-дав агакьна шикилар, чарчикайни пластикадикай авунвай шейэр эцигнавай. Аялрин худшколадин директор Г.Мамашевади къейд авурвал, педагогарни аялар и выставкадиз тамам са йисан къене гьазур хьана. “И выставкадалди, – лагьана ада, – виридан умуми зурба кардик чна жуван пайни кутазва. Вири сад хьайила, чавай планетадин экология хуьз, мадни несилриз уьмуьр багъишиз алакьда. Чи выставкадин кьилин метлебни, экологиядин рекьяй чирвилерни тербия гуналди, тIебиат хуьн виридан буржи тирвилин фикир арадал гъун я…”

“Лезги Газет”


Всего просмотров: 4

Читайте также:

Добавить комментарий

Войти с помощью: