Нетижалудаказ кIвалахин

Дагъустандин Кьилин везифаяр вахтуналди тамамарзавай Владимир Васильева 4-июндиз государстводин властдин органрин руководителрин иштираквал аваз гьар гьафтедин совещание тухвана, хабар гузва РД-дин Кьилин ва Гьукуматдин Администрациядин пресс-къуллугъди.

Совещанидал Петербургда кьиле фейи XXII международный экономический форумдин нетижаяр веревирдна, республикадин образованидин организацийрин работникриз отпускдин пулар вахтунда гун таъминарунин серенжемриз килигна.

РД-дин экономикадин ва  территорияр вилик тухунин министр Осман Хасбулатова малумарайвал, Петербургдин международный экономический форумдин сергьятра аваз Дагъустандин делегацияди  вилик финин рекьяй федеральный институтрин векилрихъ, банкарин сектордин промышленностдин рекьяй векилрихъ, кьилди къачуртIа, Россиядин Сбербанкдин, МСП банкдин, “ВЭБ-лизинг” АО-дин, “Ростех” госкорпорациядин ва  “Авиаэцигунрин сад авунвай корпорация” АО-дин векилрихъ галаз гуьруьшар кьиле тухвана.

“Чи регионда “ВЭБ-лизингдин” менеджерди кIвалах тухузва. “Хазар фиш” ООО  адахъ галаз килька балугъар кьадай кьве гими маса къачунин патахъай­ икьрардал атанва. И савдади йисан вахтунда кьаз­вай килька балугърин кьадарар 4 агъзур тонндив агакьдайвал артухардай мумкинвал гуда (алай вахтунда и балугъар йи­са 730 тонндин кьадарда аваз кьазва).

Форум кьиле фидай чIавуз Сбербанкдихъ галаз санал кIвалахунин гьакъиндай икьрардални къул чIугуна. “Стратегический инициативайрин агентстводихъ” галаз агъадихъ галай рекьерай икьрардал атанва: республикада инвестицияр желб авунин жигьетдай гьалар хъсанарунихъ элкъуьрнавай серенжемар кьиле тухун, “Дуьз къараррин туьквен” проект кьилиз акъудун. Ам кардик кутуни  яшайишдинни экономикадин жигьетдай вилик финин лап хъсан къайдаяр уьмуьрдиз кечир­миш­дай мумкинвал гуда. Идак агротуризм вилик тухун, сагъламвилин барадай сергьятламиш хьанвай мумкинвилер авай аялар пешекарвилин жигьетдай гьазурун, инвалидар патал ресурсрин центр тешкилунин проект кардик кутун акатзава ва икI мад”, – малумарна министрди.

Владимир Васильева ахьтин центр теш­килунин важиблувал къейдна ва и кIва­­лахдал пешекар юристар-инвалидар желб авунин месэлаяр гуьзчивилик кутун тапшурмишна.

Республикадин руководителди гражданриз инвалидвал гунин карда къайда тунин барадай кьабулзавай  серенжемрин патахъайни хабардар авуна: “Кьиле тухузвай силисди къалурзавайвал, чина законсуздаказ инвалидвал къачунвай вишералди инсанар ава. Ришветбазвилин гьакъиндай шагьидвалзавай уголовный делояр къарагъарнава; гьа са вахтунда, гьакъи­­къатда сагъламвал пайгардик квачтIа­ни, инвалидвал къачуз жезвач лугьуз шел-хвалзавайбурни ава. Алай вахтунда кьиле тухузвай силисдин гьерекатри и татугайвал арадай акъудиз куьмекда”.

Дагъустандин делегацияди Петербургдин экономический форумдин кIвалахда иштирак авуниз баян гуналди, Владимир Васильева къейд авурвал,  къазанмишиз алакьай кьилин нетижа гьихьтинди я: республикадиз ихтибар ийизва. Гьа са вахтун­да ада исполнительный властдин органрин руководителар тагькимарна: “Инвесторрихъ, корпорацийрихъ, банкарихъ галаз гележегда кьиле тухун пландик кутазвай вири гуьруьшар гуьзчивилик кутада, абуруз къиметни гуда. Чахъ зурба ресурсар ва мумкинвилер ава. Чна гьерекатар, гьакI гьерекатар яз кьиле тухун лазим туш. Чун тайин тир нетижадив агакьун­ герек я. Вири жигьетрай”.

Дагъустандин Кьилин везифаяр вахтуналди тамамарзавай Владимир Васильеван гафаралди, финансламишунин лизингдин жуьредин гьисабдай, Татарстандихъ галаз санал кIвалахунин сер­гьят­ра аваз,  республикади Зеленодольский заводдивай балугъар кьун патал тайи­­нарнавай кьве гими къачунин пата­хъай икьрардал атун гьа икI нетижалудаказ кIва­лахунин мисалрикай сад я.

Куьчеяр ва гьаятар зирзибилрикай ми­хьунин месэлайрални акъазуналди, республикадин руководителди и карда бе­гьем къайда тваз хьанвачирди къалурна: “И мукьвара чун чи алишверишдин центрайра хьана. А центрайрикай садан гьаятда гзаф кьадар ящикар, кьватияр ­ха­райриз янавай. Абур гъиле-гъил аваз пресс­дик ку­­турдалай гуьгъуьниз, кьвед ла­гьай­ се­фер­да ишлемишдай хаммал хьиз, тайин чкайриз рекье тваз жедайди я эхир. Бизнесди ви­чив гвай чкайра къайда вучиз твазвач? Ша, чна и барадай инсанрихъ галаз кIвалах ийин!”.

Владимир Васильева муниципалитетрин кьилеризни чпин везифаяр пешекарвилелди тамамаруниз эвер гана: “Квехъ га­лаз санал чна шегьерра яшайишдин къулай шартIар арадал гъунин программа хъсандиз кьилиз акъудзавай, гележегдани чун яшамиш жезвай чкайрин гьакъин­дай чи паталай ни къайгъу чIугвада? Гьа­ят­ра къайда тур. Чинра чешнелудаказ гел­къвезвай гьаятарни ава. Абурун сан гьикI артухардатIа, гьадан патахъай са фи­кир-хи­­ял авуна кIанда”, – малумарна Владимир Васильева.

Совещанидал Дагъустанда образованидин организацийрин работникриз отпуск­дин пулар вахтунда гунин барадай кьабулзавай серенжемрикай малумат республикадин финансрин министрдин везифаяр тамамарзавайди тир Али Исламова гана.

12-июндиз Россиядин югъ сувар яз къейд авуниз талукьарнавай серенжемар кьиле тухуниз гьазурвал аквазвай гьалдин гьакъиндай малумат Дагъустан Республикадин Гьукуматдин Председателдин Сад лагьай заместитель Анатолий Къарибова гана.

Чи мухбир


Всего просмотров: 25

Читайте также: