Назим Мегьамедован агалкьун

И мукьвара Ленинградский областдин Гатчина шегьерда тайский боксдай кьиле фейи чемпионатда ва кIвенкIве­чи­вал патал акъажунра Санкт-Петербургда яшамиш жезвай лезги кьегьал хва Назим Мегьамедова 54 кг-дин заланвал авайбурун арада 1-чка кьуна.

“Кефердинни РагъакIидай патан региондин 20 шегьердай атанвай 230-далай гзаф жаван спортсменрин арада кIвен­кIвечи чкадиз лайихлу хьун, гьелбетда, регьят кар туш. Амма къастунал кIеви ва вичин вилик эцигнавай макьсад патал югъ-йиф талгьана зегьмет чIуг­ва­дай Назима инанмишвилелди гъалибвал къазанмишна”, — къейдзава адан тренер Степан Белозерцева.

Малум хьайивал, Назима алай вахтунда 8-классда кIелзава. Сад лагьай чIе­хи агалкьун ада вичин виридалайни багъри ксариз — дидедизни бубадиз бахшзава. Абурун ери-бине Дербент райондин Белиж посёлокдай я.

Кеферпатан меркезда Дагъустандин векил Гьасан Гьасанова Назимаз спортдин агалкьун тебрикна. Адан дидедизни бубадиз — Фарида ва Мирземегьамед Мегьамедовриз школада вири предметрай вадар аваз кIелзавай ва спортдин рекье­ни бегьерлу камар къачузвай хва тербия­ламишунай алхишдин келимаяр лагьана­.

Къейд авун лазим я хьи, Н.Ме­гьа­ме­­­дова тайский боксдай спортдин майданра икьван чIавалдини райондин ва шегьердин кIвенкIвечивал патал акъа­жунра приздин чкаяр са шумудра кьунай. Тренер С.Белозерцеван гафаралди, адан гъилик тербия ва вердишвилер къачузвай жегьилдихъ спортдин кьакьан­ кукIу­шар муьтIуьгъарун патал лазим вири ерияр — зегьметдал рикI хьун, четин­ви­лерихъай кичIе тахьун, къастунал кIе­вивал ава. Мукьвал гележегда жаванди мадни еке дережаяр муьтIуь­гъар­дайдак ада кIевелай умуд кутунва.

Вахъ мадни еке агалкьунар хьурай, Назим!

Низамидин Къаинбегов


Всего просмотров: 29

Читайте также: