Н.А. Куьребегов

И йикъара республикадин эко­но­мика, хуьруьн майишат вилик фи­ник еке пай кутур тежрибалу пешекар, алим Куьребегов Нажмудин Ами­нович 87 йисан яшда аваз рагьметдиз фена. Чна, ам чидай вирибуру, дериндай яс чIугвазва.

Н.Куьребегов 1933-йисуз Кьу­рагь­ райондин КьепIиррин хуь­ре дидедиз хьана. Хуьруьн юкьван школа­ куьтягьна ам Да­гъустандин хуьруьн майишатдин институтдин ветеринарный факультетдик экечIна ва инаг яру­ диплом къачуналди акьалтIарна.­­

1956-йисуз ам райондин хуьруьн майишатдин управленидин старший зоотехниквиле тайинарзава. Са йисалай ам ВЛКСМ-дин райкомдин 2-секретарвиле хкязава. Ахпа адал 1-секретарвилин везифани ихтибарзава. Вад йисуз Куьребегова райондин комсомолрин ва жегьилрин кIва­лах, яшайиш, азад вахт дуьз­гуьн­­да­каз тешкилун патал вичелай алакь­дай вири крар авуна.

Илимда вичин гаф лугьуз кIан­завай жегьил Ставрополь ше­гьерда кардик квай Вирисоюздин хипехъан­вилин илимдинни ахтармишунрин институтдин аспирантурадик (экономикадин рекьяй) экечIна. Пуд йисуз кIе­лай кьепIирвидиз гьа ина кIва­лах­ни гана. Са йисалай ада илим­дин кандидатвилин дережа къачуна.

Са шумуд йисуз Ставрополда кIва­лахай Куьребегов республи­ка­дин­ чIехибурун теклифдалди Вирисоюздин илимдинни ахтармишунрин экономикадин институтдин Дагъустандин отделенидин начальниквиле тайинарзава. Кьве йисалай адакай республикада цIийиз тешкилнавай совхозрин объединенидин планово-экономикадин отделдин начальник жезва.

Идалай гуьгъуьниз Н.Куьребеговал пара жавабдар къуллугъар ­ихтибарна ва ада виринра вичин чирвилер, алакьунар, тежриба ишле­мишуналди, анжах хъсан нети­жаяр арадал гъана. “Дагестангосплемобъединенидин” начальник, ДАССР-дин хуьруьн майишатдин министрдин заместитель, Дагъустандин гос­аг­ро­промдин экономикадин жигьетдай вилик фидай отделдин начальник яз ада республикада мал-къарадин, лапагрин жинсер хъсанардай, хуьруьн майишатдин суьрсетдин бегьерар артухардай серенжемар кьабулна. Ре­гиондин хейлин районриз, майи­шатриз фена, анра кIвала­хар бегьерлудаказ тешкилиз куьмекна.

Тежрибалу алимди 1987-йисалай РСФСР-дин хуьруьн майишатдин министерстводин, Махачкъалада кардик квай, руководство гудай кадрияр гьазур­дай­ техникумдин директордин заместителвилин везифаяр тамамарна. Гьа са вахтунда Да­гъус­тандин хуьруьн майишатдин ин­ститутда, Махачкъаладин гидро­мелиоративный, промышленно-экономический техникумра, масанра студентриз тарсарни гана. Куьрелди лагьайтIа, Да­гъустандин лайихлу экономист Нажмудин Куьребе­гова вичин уьмуьр Дагъларин уьлкведин хуьруьн майишат вилик тухун, адаз хъсан пешекарар гьазурун патал серфна. Адан гьакъисагъ зегьмет гзаф сеферра талукь идарайри жуьреба-жуьре шабагьралди къейдна.

Н.Куьребегова уьмуьрдин юлдаш Роза Медетовнадихъ галаз чешнелу хизанни арадал гъана, вафалу, намуслу, зегьметдал рикI алай веледарни уьмуьрдин рекьел акъудна. Абу­ру къе уьлкведин жуьреба-жуьре пипIера зегьмет чIугвазва.

Нажмудин Аминовичан экуь къамат садрани чи рикIелай алатдач. Чна рагьметлудан хизанриз, мукьва-кьилийриз, вири багърийриз башсагълугъвал гузва.

Санал кIвалахай юлдашрин ва виликан студентрин десте


Всего просмотров: 106
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире