Мегьамед Ибрагьимов

Мурк юзанва

Кьилин редактордин гаф

Кьиблепатан Дагъустандин мулкарилай авахьзавай Самур вацIал ГЭС-ар эцигунин месэладикай рахаз сад-кьве йис туш. Пешекаррин фикирдалди, электроэнергия гьасилунин жигьетдай Самурдихъ еке мумкинвилер ава. Рекъемралди рахаз хьайитIа, адахъ 1838 МВт электроэнергия гьасилиз же­дай къуват ава — им республикадин вири гидроресурсрин санлай къачур кьадардин 30 процентдиз барабар делил я.

Къейд ийин хьи, Самур вацIал ГЭС-ар эцигунин месэладиз талукь макъалаяр “Лезги газетдиз” са шумудра акъатна. Да­гъустандин кьиле Рамазан Абдулатипов тайинарай чIавуз газетдин виликан кьилин редактор Агъариза Саидова урус чIалал республикадин гьукумдин кьилевайбуруз Кьиблепатан Дагъус­танда ГЭС-рин каскад эцигуниз эвер гузвай макъала чапнай. Амма гьикьван эвер гунар, рахунар, гуьруьшар хьанатIани, ме­сэ­ла алай чкадилай юзазвачир. Та уьлкведин Президентди Да­гъус­­­тандин кьиле Владимир Васильев тайинардалди. Республикадин цIийи регьберди арадал гъайи дестеди Дагъларин уьлкведин кьиблепата ГЭС-ар эцигуниз кьетIен фикир гана. Гегьеншдиз и кардикай алатай йисан мартдин вацра “Лезги газетдиз” акъатай­ редакциядин экономикадин отделдин редактор Жасмина Саидо­вадин “Самур вацIал цIийи ГЭС-ар эцигдани?” макъалада кхьенва. Ана гьакIни “Самурэнерго” ООО-дин генеральный директор Шихсефи Сефиханова ихтилат физвай месэладиз талукь яз Вла­димир Васильеван тIварцIел рекье тур чарчикайни раханва.­

2019-йисан эхирра мурк юзана лагьайтIа жеда. Ноябрдин вацра Дагъустандин Гьукуматди Самур вацIал гъвечIи ГЭС-ар эцигунин проект кьилиз акъудун пландик кутунвайди малум хьана. Проектдин сад лагьай пай кьилиз акъудун яз, кьве плотина авай са ГЭС эцигдайвал я. ТАСС-диз интервью гудайла, РД-дин Гьукуматдин Председателдин Сад лагьай заместитель Гьа­жи­ме­гьа­мед Гьуьсейнова къейд авурвал, и кардиз серфдай инвестицийрин кьадар 6,6 миллиард манатдив агакьда.

ЦIийи йисан вилик Самурдин энергетикадин кластердин  (EcoEnergy) проектдихъ галаз Дагъустандин жемиятдин векилар ва экспертар таниш хьана. “Лезги газетдин” редакциядин конференц-залда кьиле фейи и мярекатда РД-дин Общественный палатадин векилри, энергетикри, алимри, экспертри, журна­листри ва масабуру иштиракна. Гуьруьшдал проектдиз талукь жуьреба-жуьре месэлаяр веревирдна.

“EcoEnergy”-дин генеральный директордин заместитель Мансур Къадимован гафаралди, алай вахтунда проектдиз талукь документация гьазурзава. Имни са акьван регьят кар туш. Проект геодезиядин, геологиядин жигьетдай ахтармишна, проект­динни сметадин документация гьазурна, государстводин ­эк­спертиза тухвана ва са жерге маса месэлаяр гьялна кIанзава.

Мадни гуьруьшдал малум хьайивал, “EcoEnergy”-дин векилри республикадин Гьукуматдихъ галаз сих алакъада аваз кIвалахзава. Инвестицийриз талукь икьрарар веревирдзава. Мукьвал тир девирда сифтегьан инвестицияр агакьун лазим я.

Лагьана кIанда, Самур вацIал гъвечIи ГЭС-ар эцигун фи­кирдиз­ къачунва. Пешекарри къейдзавайвал, ихьтин дуьшуьш­да Самур­ дередин чилериз зиянар жедач. Проект кьилиз акъуд­дай чIавуз   халкьди менфят къачун тийизвай мулкарикай хийир­ къачуда.

Самурдин энергетикадин кластердин проектди Самурдин там хуьникни вичин пай кутада. Мансур Къадимова къейд авурвал, проектдин сергьятра аваз неинки са “Самурский” милли паркунин, гьакIни вири Самур дередин сергьятра тамар арадал хкида.

Са гафуналди, ихтилат физвай проектдикай неинки са Самур­ дере, гьакI вири Дагъустан патал еке метлеб ава. ЦIийи ГЭС-ар  эцигуникди Дагъларин уьлкведа гьасилзавай электроэнергия артух, кIвалахдай цIийи чкаяр жеда ва, санлай къачурла, респуб­ликадин экономика виликди фида.

Мегьамед Ибрагьимов


Всего просмотров: 216
Подпишитесь на наши каналы:

Читайте также:


Новости партнеров