Мугьманар хушдаказ кьабулдай чка

16-апрелдиз Дагъустандин Кьил Владимир Васильеван регьбервилик кваз нубатдин совещание хьана. Анал республикада туризм авай гьал ва ам вилик тухунин мумкинвилер веревирдна. Идан гьакъиндай РД-дин Кьилин ва Гьукуматдин Администрациядин пресс-къуллугъди хабар гузва.

Килигзавай месэладин важиблувал къейд авуналди, Влади­мир Васильева лагьана: “Къе туризм вилик тухун, чи курортрин фонд цIийи хъувун, агьалийрин сагъламвал мягькемарун — ибур чпел яргъал вахтунда ва галай-галайвал машгъул хьун истемишзавай везифаяр я”.

Республикада туризм вилик тухунин рекьерикай сад яз РД-дин Кьили туризмдин барадай гьеле авай къурулушар дуьзгуьн­даказ ишлемишун лазим тирди къейдна.

РД-дин Кьили мадни алава хъувуна: “Неинки чи агьалийрин игьтияжар, гьакIни россиявийрин лап вини дережадин истемишунар кьилиз акъудиз жедай курортрин алай аямдин гзаф менфятлу майданар арадал гъун герек я.

Зун дагъустанви хьана кьве йисни туш, амма иниз акъатун кьисмет хьанвай зун инанмиш хьайивал, Дагъустан мугьманар хушдаказ кьабулдай чка я. Ина туризмдин барадай кIватIнавай лап хъсан тежрибадикай менфят къачуна кIанда”.

Совещанидал туризм вилик тухунин ва адан махсус къурулу­шар арадал гъунин барадай тухузвай кIвалахдикай РД-дин Минтуризмдин кьил Расул Ибрагьимова гегьеншдаказ суьгьбетна. «Туристрин кьадар йисалай-суз артух жезва, 2018-йисуз абурун сан 685 агъзур касдив агакьна. Туризмдин къурулушар авай гьалдиз, объектрин санитариядин гьалдиз талукь месэлаяр хцидаказ вилик акъвазнава. Абур муниципальный тешкилатрихъ галаз сих алакъада аваз гьялун герек я. Республикада 52 турбаза, санаторийрин 25 идара, 125 мугьманхана, мугьманар кьабулдай 40 кIвал ава. Алатай йисуз кьилдин ксарин инвестицийрин гьисабдай 6 мугьманхана кардик кутуна”, — лагьана Минтуризмдин регьберди. Ада регионда мугьманри ва республикадин агьалийри чпиз иллаки еке итиж ийизвай туризмдин 12 маршрут авайдакайни хабар гана.

Совещанидал  хуьрерин чкайра туризм вилик тухуниз фикир гудайдакайни ихтилат кватна.

Республикадин руководителди мугьманрин кIвалерин иесийриз куьмек гун ва абур тайин тир вахтуналди налогар гуникай азад авун теклифна.

Совещанидал Россиядин туризмдин ва сервисдин госуниверситетдин Махачкъалада авай филиалдин директор Зуьльмира Ханбабаевани рахана.

“Республикадин туризмдин хел кадрийралди таъминарунин жигьетдай авай гьалар веревирд авуни къалурайвал, чIехи пай къуллугъчийрихъ кардик квай стандартрал асаслу яз истемишзавай хьтин пешекарвал авач”, — къейдна З.Ханбабаевади ва пешекарвилин алава чирвилер гунин программа активдаказ кьилиз акъудун теклифна.

Вичин нубатдай яз Владимир Васильева инсанриз неинки  чирвилер гун, гьакI абурун пешекарвал хкажун герек тирди къейд­на.

Совещанида РД-дин Гьукуматдин Председатель А.Здунова, Дагъустандин Халкьдин Собранидин Председателдин Сад лагьай­ заместитель С.Агьмедова, РД-дин къенепатан крарин министр А.Мегьамедова ва маса ксари иштиракна­.

Чи мухбир


Всего просмотров: 27

Читайте также: