Муьгъ къайдадиз хкана

Ахцегь райондин “ЦIийи дуьнья” газетдин алатай йисан 52-нумрада Хкемрин хуьруьз фидай­ муькъуьн винел алай тахтаяр ханвайдакай ва и месэла энгелвал авачиз гьялна кIанзавайдакай макъала чапнай. Ингье алай йисан феврал­дин вацра гьарайдиз гьай лугьудай мергьяматлу инса­нар­ пайда хьана. Муьгъ ремонтна, къайдадиз хкун патал эцигунардай материалар маса гузвай Жавид Ашуралиева вичин патай тахтаяр ва ге­рек маса шейэр га­на. Садакьадин харжияр яз, Хкемрин хуьряй тир Тель­ман Имамовани уму­ми кар патал куьмекдин гъил яргъи авуна.

Хкемвияр тир Мегьдихан Абдуллаева, Балабег Вагъуфова жемятдин­ садакьайралди муьгъ ремонт авунин кIва­лах­ра активвилелди иштиракна. И кIва­лах­рик гьакI ДЭП-4 карханадин инженер Мамед Абдулгьалимо­ва, эци­гу­нардай бригададин мастер Руслан Гъазалиева, рабочияр тир Медет Ба­­гъиро­ва, Эмирали Жумалиева, Рафик Къужаева, Мурад­ Агъа­е­в­а, Агъа Мирзоева лайихлу пай кутуна. Муьгъ ремонт авунин кIвалах­риз­ 10 м3 тах­таяр ишлемишна. Вирибурун садакьаяр Аллагьди­ кьабул­рай! Къуй чи арайра ихьтин мергьяматлу, гьарайдиз гьай лугьудай инсанар гзаф хьурай.­

Хкемрин хуьруьн агьалияр шад жедай мад са вакъиа хьанва. Инсан­риз ва автотехникадиз къулай хьун патал хуьруьз къведай рехъ къайда­диз хкунин мураддалди гьеле алатай йисалай ремонтдин кIвалахар башламишнай. Абур тендерда гъалиб хьайи Дербент шегьер­дин ООО ДЭП-дин­ эцигунардай бригадади кьиле тухвана. И кIвалахра гьакI Ахцегьрин ДЭП-4 карханадин грейдердал кIвалах­завай Сираж Саидова, тракторист­ Насир Жалилова иштиракна. Муьгъ ва рехъ ремонт авуна иштирак авур ва пулдин садакьаяр гайи вирибуруз Хкемрин хуьруьн жемятди, “Сельсо­вет Ахтынский” СП-дин кьил Низами Эфендиева сагърай лугьузва.

Рагьидин Эминов


Всего просмотров: 30

Читайте также: