Москвадин патай савкьат

Москвадин мэрияди Дагъустандин меркездин кьилин майдан цIийикIа туькIуьр хъувун патал 350 миллион манат пул чара авунва. Идакай республикадин Кьил Владимир Васильева саласа юкъуз кьиле фейи совещанидал хабар гана.

“Чаз Москвади 350 миллион манат пул багъишнава. И такьатрин куьмекдалди чна Махачкъаладин кьилин майдан цIийикIа туькIуьр хъийида. Ленинан гуьмбет, адан патав гвай трибунаяр майдандин архитектурадин чара ийиз тежер пай я. Гьавиляй анагни гьа авайвал къайдадиз хкида”, — лагьана региондин Кьили.

Владимир Васильева, майдан цIийи­кIа туькIуьр хъийидайла, къведай йисуз анал ЧIехи Гъалибвилин 75 йис тамам хьуниз талукьарнавай мярекат кьиле ту­худайди фикирда кьун тIалабна. Мярекатдин сергьятра аваз техникадин, жуьреба-жуьре подразделенийрин парадарни тешкилда.

“Майдан мягькемди хьун герек я. И кардиз кьетIен фикир гана кIанда. Махачкъаладин агьалийри фадлай цIийи майдан вилив хуьзва. Чна ам шадвилин, суьгьбетрин макан жедай къайдада аваданламишун чарасуз я…”  — алава хъувуна Дагъустандин Кьили.

Махачкъаладин мэр Салман Дадаеван гафаралди, алай йисан ноябрдин вацралди майдан цIийикIа туькIуьр хъувунихъ галаз алакъалу кIвалахар акьал­тIариз хьун мумкин я.

РикIел хкин, са кьадар вахт идалай ви­лик Москва шегьердин гьукуматди Ма­хачкъаладин администрациядиз 15 троллейбусни багъишнай.

«Лезги газет»


Всего просмотров: 45

Читайте также: