Министрдихъ галаз месэлаяр веревирдна

И йикъара Кьурагь райондин кьил Замир Азизова РД-дин хуьруьн майишатдин ва недай суьрсетдин министр Абзагьир Гьуьсейновахъ галаз гуьруьш кьиле тухвана. Идакай «Лезги газетдиз» райондин администрациядин пресс-къуллугъди хабар гана.

Чешмеди къейдзавайвал, гуьруьшдин вахтунда абуру хуьруьн майишатдин хилез талукь месэлаяр, гьа жергедай яз инвестицияр желбунин гьакъиндайни веревирдер авуна, абур гьялдай рекьер жагъурна. Кьурагь районда санлай хуьруьн майишат вилик тухун патал  чIижерхъанвилиз, балугъчивилиз, цIийи КФХ-яр арадал гъуниз, авайбурни гегьеншаруниз талукь месэлайриз дикъет гун герек я.

Кьве терефди КФХ-яр тешкилунин жигьетдай гьар йисуз кIвалах тухунин, гьакIни хуьруьн майишатдин чилер ишлемишунин кардал муниципальный гуьзчивал артухарунин чарасузвални къейдна.

Райондин администрацияди хуьруьн майишатдин метягьар гьасилзавайбуруз конкурсдин бинедаллаз грантар къачунин кардани куьмек гуда. Малум тирвал, ихьтин конкурсар себеб яз, гьукуматдин программайрин сергьятра аваз, хуьруьн майишатдиз куьмек яз региондин ва федеральный бюджетрай такьатар чара ийизва.

Гуьруьшдин эхирдай министр А.Гьуьсейнова кIвалахдин рекьяй вич Кьурагь райондиз атун хиве кьуна.

«Лезги газет»


Всего просмотров: 45

Читайте также: