Милливили агудзава

Малум хьайивал, алай вахтунда Краснодардин крайда 5 агъзурдалай гзаф лезгияр яшамиш жезва. Ватанэгьлийри милливал хуьнин макьсаддалди жуьреба-жуьре мярекатар, шадвилин суварар санал тешкилзава. Мукьвара зун ихьтин хъсан кIвалахрик кьил кутазвайбурукай сад тир  Ярагьмед  Алаудинович  Ярагьмедовахъ  галаз таниш хьана.

Ам 1952-йисуз Кьасумхуьрел дидедиз хьана. 1969-йисуз хайи хуьруьн 1-нумрадин мектеб ва 1972-йисуз Дагъустандин политехнический техникум куьтягьна. Ватанэгьлиди вичин зегьметдин рехъ 1969-йисуз Кьасумхуьруьн консервийрин заводда цехдин фялевиле кIвалахунилай башламишна.

1975-йисуз ам кьисметди Адыгея республикадиз акъудна. Я.Ярагьмедова “Юриспруденция” пешедай Кубандин гьукуматдин университет куьтягьна. Адакай Адыгея республикадин Тахтамукайский райондин кьилин сад лагьай заместитель, гьукуматдин 1-классдин меслятчи хьана. 1975-йисалай комсомолдин тешкилатдин секретарвиле, профкомдин председателвиле, Адыгеядин консервийрин комбинатдин парткомдин секретарвиле кIвалахна.

1986-йисалай эгечIна руководителвилин жавабдар къуллу­гъар­ пешекарвилелди кьилиз акъудна: КПСС-дин Адыгеядин автономный областдин Октябрский РК-дин секретарвал, тешкиллувилин отделдин заведующийвал, муниципальный эменни идара авунин рекьяй тир комитетдин председателвал.

1997-йисуз алакьунар авай пешекар Тахтамукайский райондин кьилин заместителвиле тайи­нарна. 2000-йисалай адакай райондин кьилин сад лагьай заместитель хьана. Я.Ярагьмедова кIва­лахай вахтунда хейлин цIийи мектебар, аялрин бахчаяр эцигна, эменни тIимил авайбурун, етим аялрин яшайишдин ме­сэлаяр гьялна, жегьилрин сиясат вилик фена. Экономикадин, яшайишдин ва медениятдин хилерай Тахтамукайский район Адыгеядин вилик фенвай район хьиз машгьур хьана. Арадал атай нетижайрик жавабдарвилелди, гьакъисагъвилелди кIва­лах кьилиз акъудунин ерияр хас тир Ярагьмедан пайни ква. Гьавиляй ада амадагрин, агьалийрин патайни гьуьрмет къазанмишнава.

2007-2012-йисара чи ватан­эгьлиди Краснодар шегьердин РагъакIидай патан округдин адми­нистрациядин кьилин заместитель яз кIвалахна. 2012-йисан мартдилай ам мад идалай вилик кIвала­хай къуллугъдал — Тахта­му­­кай­ский райондин кьилин сад лагьай за­мес­тителвиле тайинар хъувуна. Санлай къачурла, ада саки 40 йисуз муниципальный къуллугъ кьилиз акъуднава.

Алай вахтунда ял язаватIа­ни, милливал хуьнин карда ада да­тIана зегьмет чIугвазва. Халкьарин арада дуствал мягькемарунин месэлайриз ада гьамиша ди­къет гузва. Милли диаспорайрин арада авай алакъаяр гегьеншарунин кIвалах тухузва. Ада Краснодарский крайдин ва Адыгея Республикадин лезгийрин жемиятдин тешкилатдин председателвал ийиз гзаф йисар я. Намуслувилелди гьукуматдин ва муниципальный къуллугъ кьилиз акъудунай Ярагьмед Алаудинович са шумуд сеферда Дагъустандин президентдин, Адыгеядин гьукуматдин Советдин-Хасэдин, Тахтамукайский райондин, Краснодар шегьердин администрацийрин гьуьрметдин грамотайралди ва маса шабагьралди къейднава.

Милли адетар хуьнин, сада-садаз куьмекар гунин, дуствилин алакъаяр мягькемарунин мураддалди 1999-йисуз Я. Ярагьмедова Краснодардин крайдин лезгийрин тешкилат арадал гъана.

“Са жерге ватанпересрихъ галаз санал чна ина гьар йисуз Яран сувар ва маса шадвилин мярекатар кьиле тухузва, жуван миллетдин векилар сад-садав агудзава”, — лугьузва ватанэгьлиди.

Куругъли Ферзалиев


Всего просмотров: 152

Читайте также: