Милли проект кьилиз акъудда

20-августдиз РД-дин Гьукуматдин Председателдин заместитель Абдулмуслим Абдулмуслимова Дагъустанда “Экология” милли проект уьмуьрдиз кечирмишунин месэладай совещание кьиле тухвана.

Веревирдерив эгечIдалди вилик, вице-премьерди къейд авурвал, РД-дин Кьил Владимир Васильева милли проек­тар уьмуьрдиз кечирмишуниз кьилин фи­кир гузва ва абурухъ галаз алакъалу ви­ри месэлаяр гуьзчивилик кутунва. Идахъ галаз алакъалу яз, Абдулмуслим Аб­дул­муслимова кIватI хьанвай вири ру­ково­дителриз месэладив жавабдар­вилелди, фагьумлувилелди эгечIуниз эверна.

“Экология” милли проект уьмуьрдиз кечирмишуни и хиле авай месэлаяр гьялунин карда къугъвадай важиблу роль къейд авуналди, председателдин замес­тителди лагьана: “Экология” милли проектдик федеральный 11 проект ква, абу­ру­кай ругуда Дагъустандини иштирак­зав­­а. РД-дин тIебиатдин ресурсрин ва экологиядин министерстводин хиляй — “Коммунальный кIеви амукьайрихъ галаз алакъалу комплексдин система”; “Био­логический жуьреба-жуьревал хуьн ва экологический туризм еримлу авун”; “Михьи уьлкве”; “Цин надир объектар хуьн”. “Михьи яд” проект РД-дин эци­гунрин ва ЖКХ-дин министерстводи уьмуьр­диз кечирмишзава, “Тамар хуьн” проект — РД-дин тамарин майишатдин ре­кьяй тир Комитетди”.

Месэла веревирдун давамаруналди, Абдулмуслим Абдулмуслимова малумарайвал, винидихъ тIварар кьунвай мил­ли проектар кьилиз акъудун патал алай йисуз 376,8 миллион манат пул чара авун фикирдиз къачунва. Председателдин заместителди кьилин фикир агал­кьун­риз, гьакIни крар тамамардайла ацалтай четинвилеризни хаталувилериз гана.

“Вири санлай 19 икьрар кутIундай фи­­кир ава, къенин юкъуз абурукай 13 кутIуннава. Абур вири РД-дин тамарин майишатдин рекьяй тир Комитетдин патай я, и кардай ведомстводиз чIехи чухсагъул къвезва”, — тестикьаруналди, ви­це-премьерди алава хъувуна хьи, амай икьрарарни графикдив кьурвал кутIунда.

Гуьгъуьнлай региондин талукь тир ведомствойрин руководителри “Экология” милли проект уьмуьрдиз кечирмишунин сергьятра аваз гьихьтин серенже­мар кьиле тухузвайтIа ва чеб и кIва­лахда гьихьтин четинвилерал ацалтзаватIа, гьадакай ихтилатна.

Веревирдерин нетижаяр кьадайла, милли проектда къалурнавай кIвалахар агалкьунралди кьилиз акъудунин ва такьатар вахтунда серфунин важиблувал рикIел хкуналди, Абдулмуслим Абдулмуслимова тайин тир тапшуругъар гана.

«Лезги газет» 


Всего просмотров: 29

Читайте также: