Миллетдин тIвар хкажиз…

Чи ватанэгьлияр – гьар сана

Астраханда яшамиш жезвай чи ватанэгьли Ибрагьим Ибрагьимова заз мугьманвиле атун  теклифнай. “Махачкъала-Астрахань” поезддин вилик ада зунни захъ галай журналист Эльман Абас хушдиз къаршиламишна. Шегьерда зулун бере тир, кьуд пад къизилдин рангуниз элкъвенвай куьчейрай инсанрин ачух ва шад чинар аквазвай.

Ибрагьим Ибрагьимова чун са шумуд дагъустанвидихъ галаз танишарна. Абурукай сад  Юсуф  Бу­карович  Зейнединов  тир. Ам Ахцегь райондин Хкемрин хуьре 1965-йисан 15-февралдиз Букаранни Таватан хизанда дидедиз хьана. Мектеб акьалтIарна, Юсуф армиядиз фена. Гуьгъуьнлай Астрахандин профтехучилищеда кIелна, ашпазвилин документ къачуна, Орскда ракьун рекьерал слесарвиле кIва­лахна.

Са кьадар йисар алатайла, Юсуф Зейнединова ДГУ-дин экономикадин факультет, Санкт-Петербургдин МВД-дин академия акьал­тIарна. Алишверишдал машгъул хьайи чи ватанэгьлиди са ОАО-да директордин заместитель яз кIвалахна. Яваш-яваш ада хсуси карчивал арадал гъана: кьа­кьан мертебайрин кIвалер эцигдай­ кар­­хана. Карханади Астраханда хъсан еридин, къулай шартIар авай хейлин кIвалер эцигнава. Шегьерда Юсуф Зейнединоваз екез гьуьр­метзава, чкадин гьукумдарриз ам хъсандиз чизва. Чи ватан­эгьлидини абурухъ галаз ала­къа­яр хуьзва.

2001-йисуз Юсуф Букаровича виридалайни екеди яз гьисабзавай “Стройиндустрия” тIвар алай хсуси холдинг тешкилна. 2011-йисуз чи ватанэгьлиди нубатдин “Астрдомстрой” кархана ачухна.

“Сад тир Россия” партиядин член  Юсуф Зейнединова шегьердин жемятдин уьмуьрдани активнидаказ иштиракзава. 2016-йисуз ам Астрахандин областдин депутатвиле хкяна. Мадни башкъа, чи ватанэгьли областдин эцигунрин  комитетдин председатель я. Къейд ийин хьи, Юсуф Зейнединова алакьунар авай жегьилриз-спортсменриз, художникриз, шаирриз, шегьерда авай яшайишдин объектриз, набутриз, ветеранриз вичелай алакьдай куьмекар гузва. Шегьердин руководстводи адаз “Астрахандин вилик лайихлувилерай” медаль, “Къи­зилдин лавр” знак ­ганва.

Вичин хайи хуьр тир  Хкема ада мискIин эцигнава. Астрахандин областдин депутат Аскер Пашаева къейдзавайвал, Юсуф Букарович жумарт рикI авай инсан я.

Уьмуьрдин юлдаш Рабиятахъ галаз санал ада чешнелу, къени хизан арадал гъанва.

Юкъуз акур Астрахань шегьердин къамат нянихъ заз лотос хьиз ачух хьана. Ибрагьим Ибрагьимовани Юсуф Зейнединова чун  йифен поездда аваз рекье хтуна, абуру Дагъустанда авай лезгийриз саламар лугьун тIалабна.

Аферин ихьтин рухвайриз, чеб авай чкайра чи миллетдин тIвар, ад хкажзавай, хайи Ватан рикIелай алуд тийизвай…

Бикеханум Алибегова


Всего просмотров: 98

Читайте также: