Мегьарамдхуьруьн райондиз РД-дин здравоохраненидин министр мугьман хьана

“Лезги газетдиз” Мегьарамдхуьруьн райондин администрациядин пресс-къуллугъди хабар гайивал, райбольницадиз и йикъара РД-дин здравоохраненидин ­министр Жамалудин Гьажиибрагьимов ­атана.

Райондин кьил Фарид Агьмедован заместитель Гьабибуллагь Мурадалиевахъ ва больницадин кьилин духтур Гьажибала Беглеровахъ галаз санал ведомстводин регьбер райондин больницадин кIвалах­дихъ, чкадал медицинадин рекьяй ийизвай къуллугърин еридихъ галаз таниш хьана.

Ж.Гьажиибрагьимован гафарай малум хьайивал, ам и йикъара республикадин са шумуд райондин больницайриз фена. Командировкайрин кьилин макьсад чкадал медицинадин рекьяй куьмек гун тешкилнавай гьалариз къимет гуникай ибарат я. Министрдин фикирдалди, кIвалах вилик тухун патал, сифте нубатда, хуьруьн чкада яшамиш жезвай агьалийриз медицинадин рекьяй куьмек гунин карда авай месэлаяр ва абур гьялдай рекьер тайинарна кIанзава.

Больницадиз фейила, Ж.Гьажиибра­гьимова материально-технический база, здравоохраненидин идара дарманралди таъминарунин гьал ахтармишна, азарлуйрихъ ва духтуррин коллективдихъ галаз рахана.

Азарлуйрин патай наразивилер хьанач, абуру чпиз медицинадин рекьяй ийизвай къуллугърилай разивал къалурна.

Лагьана кIанда, Мегьарамдхуьруьн райондин больницадин дарамат ремонт авунин, материально-технический база цIийи хъувунин игьтияж ава. И кар РД-дин здравоохраненидин министрдини къейдна.

«Лезги газет»


Всего просмотров: 47

Читайте также: