Мегьарамдхуьре СтIал Сулейманан 150 йис къейдна

16-майдиз Мегьарамдхуьруьн  райондин медениятдин кlвале чlехи арифдардин юбилейдин зурба мярекат хьана. 

Ана райондин кьил Фарид Агьмедова, администрациядин къуллугъчийри, Лезгийрин госмуздрамтетрдин артистри, Сулейман бубадин хтул Стальская Шамсията, къа­дим Дербент ва Махачкъала шегьеррай, Дербент, Сулейман- Стальский , Хив районрай, гьакlни Мегьарамдхуьруьн  райондин хуьрерай атанвай тlвар-ван авай шаирри, лезги чlалан тарсар гузвай му­­аллимри, культурадин хилен ра­ботникри, общественный тешкилатрин векилри, райондин гьевескар артистри, школайра кlелзавай аялри  иштиракна.

Мярекатдал райондин культурадин отделдин заведующий, межлисрин тамада Эседуллагь Селимова сиф­те гаф райондин кьил Фарид Агьмедоваз гана.

—  Саламалейкум, гьуьрметлу мугьманар ва чи райондин aгьа­лияр!

Чlехи шаир Стlал Сулейманан уьмуьрдикай, адан яратмишунрикай гзаф алимри, шаирри ва писателри чпин фикирар лагьанва, ктабар акъуднава.

Стlал Сулейманан 150 йисаз талукьарнавай мярекатар чи  райондин культурадин идарайрилай гьейри, мектебрани гегьеншдиз тешкилна.

Вичин шиирра шаирди лезги халкьдин четин яшайиш, инсанрин хъсан ва пис терефар, дагъви кесибрин уьмуьр, дердер-гъамар къа­лурнава. Ада вичин гъвечlи халкь дуьньядиз машгьурна, — лагьана Ф.Агьме­дова.­

Сегьнедиз  Мегьарамдхуьруьн 1-нумрадин СОШ-дин аялар ва муаллимар экъечlна. Абуру СтIал Сулейманан эссеррикай гьазурнавай музыкадинни литературадин композиция кlватl хьанвайбуру  гурлу капар ягъуналди кьабулна.

Микрофондихъ шаир, РД-дин культурадин лайихлу работник, СтIал Сулейманан фондунин председатель Сажидин Саидгьасанов гала.

— Мегьарамдхуьруьн  райондин играми агьалияр, гьуьрметлу вахар,  стхаяр, квез чи райондин агьа­лийрин патай чlехи салам.

Къе чна и райондин векилар тир, лезги халкь машгьур авур Ярагъ Мегьамед хьтин зур­ба алимдал, писатель Абдулагь Искенде­ро­вал, Дагъустандин Халкьдин шаир Аб­дусе­­лим Исмаиловал, РФ-дин лайихлу артист Аб­дул Гьабибовал, РД-дин Халкьдин артистар Мир­зебег Мирзебеговал, Мамед Ма­ме­довал, шаирар Къадир Рамазановал, Желил Мурада­­­лие­вал, композиторар Халил Халиловал, Ке­римхан Бабаевал ва масабурал дамахзава.

РД-дин Халкьдин артист, лезги театрдин кьилин режиссер  Мирзебег Мирзебегов:

— Институт акьалтlарна, зун Дер­бентдиз хтайдалай инихъ 50 йис тамам хьанва. И вири йисара, сифте артистди, ахпа режиссёрди хьиз, гьар майдин вацра за и шадвилера иштиракзава.

Стlал Сулейман яратмишзавайбурун руьгьдин буба я. Гьаниз килигна, чун гьар йисуз и руьгьдин де­режа хуьн ва давамарун патал санал кlватl жезва­.

Сулейманан дережаяр генани виниз жезва. Ам чна хвена кlанда, ада чаз тунвай ирс ге­гьенш къатариз раижна кlанда.

РФ-дин журналистрин Союздин член, шаир Абидин Камилов:

— Къе Мегьарамдхуьруьн рай­он­да ихьтин межлис къурмишунал чун гзаф шад я. Ихьтин мярекатар­, чи райондин аял­рин бахчай­ри­лайни­ школайрилай эгечl­на, культурадин маканрани гурлудаказ кьиле физ­ва­.

Чна чи райондин газетдани и мярекатриз, адан уьмуьрдикай цlийи-цlийи делилриз  еке чка гузва.­

За къенин мярекатдин тешкилатчийриз сагърай лугьузва.

Микрофондихъ Стальская Шам­сиятаз эверайла, залдик юзун акатна:

—  Гьуьрметлу мугьманар, чи бу­бадин къелемдин дустар! Къе районда и шад мярекат тешкилунал зун гзаф шадни я, разини. Зи уьмуьрдин­ чlехи пай и райондихъ галаз ала­къалу хьана. Заз чин ачухай, зи кlва­­л­ахдиз къи­­мет гайи, заз гьуьрмет авур район я. Зи бу­­ба Ватан, Армия кlани инсан тир. Ватан хуь­дай­ ва машгьурдай кьегьалар къуй гзаф хьурай!

Ярославль шегьердай хтанвай чи ватанэгьли, шаир, переводчик Мамед Халилова къейдна:

— И межлисдиз эверунал зун гзаф шад я. Яшамиш  Ярославль шегьерда жезватIани, зи ери-бине ина ава. Зун, чlехи шаир Стlал Сулейманан мярекатра иштиракда лагьана хтанва…

Хив райондай тир афоризмайрин устад  Де­­мирбег Эмирбегова,  шаирар, РФ-дин журналистрин Союздин членар тир Мукаил Агь­ме­до­ва, Вадим Жамалдинова ва и цlа­рарин авторди Стlал Сулейманан кьисметдикай, шииратдин алемдикай, ада чаз тунвай ирсиникай суьгьбетна, юбилярдиз бахшнавай ши­и­рар кlелна.

Ахпа райондин культурадин кlва­лин гьевескарри гьазурнавай концерт гана.

Къагьриман Ибрагьимов


Всего просмотров: 20

Читайте также: