Марина Ибрагьимова гъалиб хьана

Мулкар вилик тухунин рекьяй жуьреба-жуьре проектар къалуруналди, Россияда «Зи уьлкве – зи Россия» конкурс кьиле физ 16 йис я.

Петербургдин международный экономикадин форумдал (ПМЭФ) цIинин йисан конкурсдин нетижайрай гъалибчийриз наградаяр гунин шад мярекатни кьиле фена. Гъалиб хьайи проектрин арада коммерциядинбур тушир, амма чеб лап важиблубурни ава. ИкI, мисал яз, Ахцегьай тир Марина Ибрагьимовади Дагъустандин 8 чIалал эдебиятдин 22 эсер (жуьреба-жуьре писателрин машгьур эсерар) кIелнавай аудиокхьинар арадал гъана ва абур интернетда эцигна.

«Дагъустан – им чIалан алимрин женнет, дагъларин уьлкве ва чIаларин дагъ я. Дагъустан чIаларин уьлкве яз амукьун патал абур хуьн, къвезмай несилрал агакьарун гзаф важиблу я. Милли эдебиятдизни кьетIен фикир гунин чарасузвал ава, и жавабдарвални чи хиве гьатзава», — лугьузва «Зи уьлкве – зи Россия» конкурсдин гъалибчи Марина Ибрагьимовади.

Къейд ийин, М.Ибрагьимовади 2017-йисуз Дагъустандин гьукуматдин университетдин филологиядин факультетдин Дагъустандин чIаларин отделение куьтягьна. Алай вахтунда ада и университетдин магистратурада кIелзава.

«Лезги газет»


Всего просмотров: 51

Читайте также: