Майрудин Бабаханован – 60 йис

Гьуьрметлу Майрудин Бабаханович Бабаханов!

Чаз вун алай аям­дин милли лезги шииратда кьетIен рехъ, чIалан алемдин кье­тIен хатI, анжах са ваз хас тир гьиссерин гурлувални нурлувал арадал гъанвай цIийи ша­иррикай сад, гьа ву­на лагьайвал, “Ра­къинин сухта” яз чида.

Идахъ галаз сад хьиз, лезги жемиятдиз вун алай аямдин камаллу муаллим, педагогикадин бажарагълу тешкилатчи, эдебиятдинни медениятдин хилера халисан женгчи хьиз машгьур я.

Критикада гьахълудаказ къейднава: “Майрудинан шиират, тупIалда къаш хьиз, чи къана­жагъда гьахьзава, эбеди яз ана вичиз чка кьазва”­.

Ви къелемдик хайи лезги чIалан алем генани ялавлу, ранглу, авазлу, цIийи ва хци жезва, гьар са гаф, дигмиш хьанвай къуьлуьн кьилера тварар хьиз, манадив ацIана, чав агакьзава.

“ЦIайлапанар, квез аквазвай, квез чизвай,

Шиирар я за цаварал кхьизвай…”

Ви ихьтин гуьзел цIарариз жаваб яз шаир ва публицист Мердали Жалилова кхьенва:

Гьакъикъат я: табдач, валлагь, гъетери,

Муьгьуьббатдин куьче кьунва цуьквери,

АцIурнава нурди вили вилерин,

Ракъин сухта тебрикзава эллери.

Кьакьан хьурай генани ви таъсибвал,

Чир тахьурай къайгъуйрикай кесибвал…

И цIарара ви яратмишунрин арш гьихьтинди­ ятIа, гьикьван адахъ хайи чилин тавар, ран­гар­, тIямар аватIа хъсандиз лишанламишнава.

Къе ви 60 йис тамам хьанва. Яратмишзавай кас патал им генани сеслу, гьевеслу, жанлу эсе­ра­р­ майдандиз акъуддай вахт я. На шиирралди кхьена, чав агакьарнавай цIийи “Келентар” ро­ман­ди ви дережаяр мадни виниз акъуднава. Неин­ки лезги, вири Дагъустандин халкьарин литературайра. Са и кардини ви тIвар несилрин ри­кIе­ра­ эбеди ийизва. Сагърай вун. Къуй яргъал йи­са­ра ви къелемдин женг зайиф тахьурай! Ракъи­нин­ сухтадихъ а вахт ва кьисмет авачирди чаз чида.

Къе вун – сухта. Пака – вахъ ви сухтаяр

Пара хьурай, кутаз цIийи бахчаяр!..

Гьамиша ваз гьуьрметзавай “Лезги газетдин” редакциядин коллектив.

Кьилин редактор: М.Ибрагьимов.


Всего просмотров: 112

Читайте также: