Мадни дерин хьурай!

Гьар  йисуз 13-январдиз чи уьлкведа Печатдин югъ къейдзава. Журналистар, мухбирар, редакторар, публицистар, корректорар, текстерин наборщикар ва маса пешейрин сагьибар яз, издательстводихъ галаз ала­къалу кIвалахрал машгъул вири ксар патал и югъ пешекарвилин суваринди я.

Рекъемар,  делилар

300 йис идалай вилик, 1703-йисан 13-январдиз  Россияда “Ведомости” газетдин сад лагьай нумра чапдай акъатнай. А чIавуз государстводин кьиле авай I Петр халкьдив зурба уьлкведин  баркаллувиликай ва гужлувиликай малуматар агакьарунин, кIелза­вайбурун ри­кIе­ра ватанпересвилин гьиссер “ахварай авудунин” карда виридалайни гужлу алат периодика тирдахъ инанмиш тир. Гьаниз килигна, 1991-йисан декабрдиз кьиле фейи РФ-дин Верховный Советдин  заседанидал “Россиядин печатдин югъ” 13-январдиз къейд авунин къарар кьабулнай.

20-асирда, кьилди къачуртIа, 1912-йисан 5-майдиз уьлкведа  цIийи жуьредин гьерекатрикай хабар гузвай “Правда” газетдин  сад лагьай нумра акъатна. И  делилдал­ бинеламиш хьана, Советрин уьлкведа печатдин хилен зегьметчийрин сувар 5-майдиз къейд ийиз хьана.­

1913-йисуз Россияда  400-дав агакьна  газетар ва журналар чапзавай, абурукай бязибурун тираж 2500-дав агакьзавай, бязибур йикъа гьатта кьве сеферда акъудзавай – агьалияр уьлкведа кьиле физвай вири крарикай датIана хабардар авун патал.

Алай вахтунда Россиядин СМИ-рин кьадар,  Роскомнадзордин делилралди, 67 340-даз, газетринни журналрин кьадар  41 038-даз барабар я. Абурун арада  “Лезги газетни” ава.

Инал къейд ийин, милли чIала­рал акъатзавай СМИ-ри сад ваъ, са шумуд важиблу везифа тамамарзава. Абурукай кьилинбур хайи халкьдин тIал алай, хциз акъвазнавай месэлаяр къарагъарун, абур гьялиз куьмек гун, гьакIни милли эдебият ва чIал хуьн я.  И жигьетдай гьи везифа асулди, гьим гуьгъуьна авайди ятIа, лугьун четин жеда, гьикI ла­гьайтIа, гзаф миллетрикай ибарат тир зурба уьлкведа гъвечIи миллетрин месэлаяр “чIе­хи стхадин” хъендик акатзава, абуруз фикир гудай мумкинвал амукьзавач.

Гьаниз килигна, “Лезги газет” кIелзавай чи вири ватанэгьлийрихъ элкъвена, заз лугьуз кIанзава: хайи газетдиз гузвай фикир тIими­лар­мир. Адан месэлаяр важиблубур туширди хьиз жемир. Виш йисуз халкьди хвена агакьарнавай милли газет-чIал гуьгъуьнлай къведай несилривни агакьдайвал ая. Хъсан крарикайни, нукьсанрикайни лагь — анжах къакъатмир.

Хайи чIалаз ийизвай итиж артухарунин, яратмишзавай ксар гьевесламишунин ва лезги журналистикадин рангар мадни бул ва девлетлу авунин макьсаддалди “Лезги газетдин” редакцияди гьар йисан эвелдай, Печатдин йикъан вилик,  жуьреба-жуьре конкурсар малумарзава ва алатай йисан нетижаяр кьазва. Адетдал амал авун яз, и йикъа­ра редколлегияди 2019-йисан нетижаяр кьуна.

Абур гьихьтинбур хьанватIа, агъадихъ галай ссылкайрай чириз жеда.

«Лезги газетди» 2019-йисан конкурсрин нетижаяр кьунва

«Лезги газетдин» редакцияди цIийи конкурсар малумарнава

Жасмина Саидова


Всего просмотров: 39
Подпишитесь на наши каналы:

Читайте также:


Новости партнеров