М.-С. Умаханован турнир

Са тIимил йикъар идалай вилик Каспийскда,    Али Алиеван тIварунихъ галай спортдин ва ­жегьилрин комплексда, Да­гъустандин машгьур политик, государст­водин ва общественно-по­литический дея­тель Мегьамед-Салам Умаха­нован  экуь къаматдиз бахшна боксдай XXI  международный турнир кьиле фена. Ана дуьньядин 21 уьлкведай — Тунисдай, Ве­не­суэладай, Китайдай, Латвиядай, Израилдай, Эстониядай, Тажикистандай, Индиядай, Шве­циядай, Белоруссиядай, Италиядай, Монголиядай ва масанрай, гьакIни Россиядай тир 220 спортсменди чпин устадвал къалурна. Къиз­гъин бягьсериз тамашиз атанвай багьа мугьманрин арада Олимпиададин къу­гъунрин, дуьньядин ва Европадин чемпионатрин гъалибчияр ва призёрар гзаф авай.

 Турнир республикадин кьиле авай ксарин тIварунихъай тебрикдин гаф лугьуналди Дагъустандин Гьукуматдин Пред­седателдин Сад лагьай заместитель Анатолий Къарибова ачухна. Ада Ме­гьамед-Салам Умаханован экуь къамат рикIел хуьнин лишан яз адан тIварунихъ кесерлу турнир кьиле тухуни  Да­гъус­тандин ва вири уьлкведин вилик адан лайихлувилериз къимет гун мад сеферда тестикьарзавайди, турнирди ­сагълам уьмуьр кечирмишуниз таъсирза­вайди, халкьарин арада спортдин рекьяй ала­къа­яр мадни мягькемарзавайди къейдна.

— Спортдин кесерлу и акъажунар кьиле тухвай вири девирда чи республикадиз  дуьньядин 40 уьлкведай тир спортсменар мугьман хьана. Турнирди хейлин спортсменриз шегьре рехъ ачухна. Гележегда абурукай дуьньядин, Европадин чемпионатрин ва Олимпиададин къугъун­рин гъалибчияр ва призёрар хьана, — алава хъувуна ада.

Гуьгъуьнлай шад мярекатдал Россия­дин боксдин федерациядин векил Агьмедхан Адилов, Умахановрин хизандин мукьва-кьили, РД-дин зегьметдин госинспекциядин регьбер Арсен Булатов ва масабурни рахана.

Регина Семедова


Всего просмотров: 30

Читайте также: