М.С. Сердеров

И йикъара чав Дагъустандин меркездай рикI тIардай хабар агакьна: яргъал чIугун тавур азардик Мирзегьасан Сердерович Сердеров  рагьметдиз фена.

Лап къени инсан, ракьун рекьерин транспортдин гьуьрметлу къуллугъчи, тешкилатчи, гьалтай гьар садаз куьмек гайи кас, баркаллу крарин иеси. Адан кIвалин рехъ тийижир, адан кIва­ле са истикан чай тахъвай  са зугьрабахуьруьнвини авач. Гьамиша хийир-шийирдин мярекатра иштиракай, хъсан крарик кьил кутур кас тир Мирзегьасан Сердерович. Ам чидай вирибуру дериндай яс чIугвазва, сада-садаз сабурар гузва.

М.С.Сердеров 1936-йисан 23-мартдиз Сулейман-Стальский райондин Зугьрабахуьре дидедиз хьана. Хуьре 7-класс, Ши­хид­хуьре юкьван школа акьал­тIарна. Хуьруьн колхозда колхозчи яз кIвалахна, армиядин жергейра къуллугъна. Челекен (Туьркмения) поселокда са йиса буругърал­ зегьмет чIугуна. Красноводскдин ракьун рекьерин сад лагьай­ техучилище акьалтIарай Ашхабад шегьердин кьилин кондуктор 1959-йисуз Ташкентдин ра­кьун рекьерин инженерар гьазурдай институтдик экечIна. 1966-йи­суз анаг агалкьунралди куьтягь­на.­

Ашхабад шегьерда ракьун рекьел жуьреба-жуьре къуллугъар кьилиз акъудна: вокзалдин дежурныйдин, сменадин начальникдин, станциядин начальникдин заместителдин. 1970-йисуз М.С.Сердеров Махачкъаладиз хтана.

1970-1976-йисара Дагъустандин меркезда ракьун рекьерал кIвалахна. 1976-1996-йисара Махач­къа­ладин вокзалдин начальникдин везифаяр тамамарна. Пенсиядиз экъечIайла карчивилел машгъул хьана: Ма­хачкъалада хсуси ресторан ­ахъайна. М.С.Сердеров  масадан дердиникай хабар кьадай инсан, чешнелу хизандин кьил тир.

Чна рагьметлудан хизандиз, мукьва-кьилийриз башсагълугъвал гузва. Адан экуь къамат чи рикIелай алатдач.

Дустар ва вири мукьва-кьилияр


Всего просмотров: 83
Подпишитесь на наши каналы:

Читайте также:


Новости партнеров