“Литература террордиз акси я!”

18-октябрдиз Дербент шегьерда, Лезгийрин Стlал Сулейманан тlварунихъ галай госмуздрамтеатрдин залда, “Литература террордиз акси я!” лишандик кваз ктабрин форум-фестиваль кьиле фена. 

РД-дин культурадин министерстводи, Расул Гьамзатован тlварунихъ галай милли библиотекади, Дербент райондин администрацияди ва Дербент шегьердин ЦБС-ди тешкилнавай мярекатда Дагъустан Республикадин терроризмдиз акси комитетдин экспертный советдин рабочий дестедин руководитель Севил Сафарбеговади, милли полити­кадин ва динрин крарай министерстводин динрин управленидин кьилин пешекар-эксперт Заур Уружева, жегьилрин крарай  минис­терстводин консультант Рамазан Мегьамедова, Дагъустандин халкьдин писателар тир Космина Исрапиловади, Аминат Абдулмана­повади, Сабигат Мегьамедовади, Дербент ше­гьердин администрациядин кьилин замес­титель Видади Зейналова, Кьиблепатан Да­гъустандин районрин терроризмдиз акси ко­мис­сийрин, образованидин ва культурадин идарайрин векилри, гьакlни Дербент шегьердинни райондин жегьилри иштиракна.

Театрдин фойеда терроризмдин темадиз талукьарна гьазурнавай, хъсан ери аваз акъуд­навай ктабрин гегьенш выставка фикир желбдайди хьанвай.

Мярекатдин тешкилатчийри фестивалдин иштиракчийриз “Кавказский экспресс — 2016”, “Дагестанцы — герои Российской Федерации” ктабар, буклетар ва флайерар пайна.

Абурун кьилин мана терроризмди инсанрин кьисметар хазвайдакай, тарихда чи геле­жегдиз чlурукlа таъсирзавайдакай я.

Мярекат ачухай  республикадин Милли библиотекадин руководитель Али Алиева ви­чин рахунра неинки терроризмдиз, гьакIни  ам арадал гъизвай себебризни женг малу­мар­на кlанзавайди къейдна. — Дагъустанвийри, иллаки жегьилри, — давамарна ада, — 20 йисан ви­лик республикада кьиле фейи вакъи­аяр садрани рикlелай алудна кlандач.

Анал рахай Севил Сафарбеговади, Заур Уружева, Рамазан Мегьамедова ва Видади Зейналова миллетрин арада садвал мягьке­маруникай ва терроризмдиз акси идеология гегьеншаруникай лагьана.

Эхирдай аялри шиирар кlелна, музучили­щедин “Виктория” ансамблди манияр лагьана­­.­­

Къагьриман Ибрагьимов


Всего просмотров: 29

Читайте также: