“Лезгистандин булахар” фильмдин презентация кьиле фена

ЦIийи  йисан вилик Кьасумхуьруьн телевиденида “Лезгистандин булахар” тIвар алаз са шумуд сериядикай ибарат документальный фильмдин презентация кьиле фена. Идакай “Лезги газетдиз” райондин администрациядин пресс-къуллугъди хабар гана. Презентациядилай кьулухъ райондин кьил Нариман Абдулмуталибов фильм гьазурнавай автордихъни оператордихъ —  Нарима  Жамаловадихъни  Мегьамед  Мегьамедхановахъ  галаз гуьруьшмиш хьана.

Гуьруьшдин вахтунда фильмдин ав­тор Нарима Жамаловади ам гьазурунин фикир арадал атуникай ва съёмкайриз талукь кIва­лахдикай суьгьбетна. Ада къейд авурвал, Сулейман-Стальский  районда авай булахрин гуьрчегвили ам ва оператор Мегьамед Мегьамедханов и имаратар виридаз раиж авунин — са шумуд сериядин (паюнин) фильм гьазурунин фикирдал гъана.

— Фильмдин сифтегьан пай къалурайдалай кьулухъ чал райондин жуь­ре­ба-жуьре хуьрерин агьалийрилай съёмкаяр давамарун тIалабзавай чарар  агакь­­на, гьикI хьи, къадим вахтарилай инихъ инсанри ишлемишзавай хейлин булахар фильмдин и паюна гьакьнавачир. Нетижада чна агьалийрин чпин куьмекдалди тамам проект арадал гъун кьетI­на, — суьгьбетна фильмдин авторди.

Нариман Абдулмуталибова “Лезгистандин булахар” фильм арадал гъунай Нарима Жамаловадиз ва Мегьамед Мегьамедхановаз сагърай лагьана ва райондин тарихдиз талукь ктабар, гьакIни Имам Яралиеван мергьяматлувилин “Умуд” фондунин тIварунихъай пулдин пишкеш гана.

— Куьне кьетIенди тир чи культурадин ивирар хуьн патал хийирлу кIвалах авунва. Булахар аваз хьунин нетижа яз, чи хуьрер арадал атана ва и карди абур хуьниз  куьмекна. Идакай акьалтзавай не­­силдиз чир хьун лазим я. Булахри къадим­ девиррин сирер ва сихилрин арада ала­къа хуьзва. Чи макандин тамашуниз ла­йихлу машгьур чкайрикай фильмаяр арадал гъунин кIвалах давамарун лазим я, — къейдна Н.Абдулмуталибова.

«Лезги газет»


Всего просмотров: 87
Подпишитесь на наши каналы:

Читайте также:


Новости партнеров