Лезги манидар машгьур конкурсда гъалиб хьана

Вичин ери-бине КцIар райондай тир Эльмира Къарахановади Муслим Магамаеван тlварунихъ галай V лагьай международный конкурсда сад лагьай чка кьуна.

Конкурсдин нетижаяр 20-октябрдиз Москвадин «Крокус Сити Холлда» кьуна.

Лезги манидарди Узеир Гьажибегован машгьур «Сянсиз» («Вун галачиз») мани вини дережада тамамарна. Конкурсда гъалиб хьунай ада 25 агъзур доллардин кьадарда аваз пулдин премия къачуда. Кьвед лагьай чка Кьиблепатан Кореядай тир Бьйон Мин Гила кьуна (адаз 15 агъзур доллардин кьадар аваз пулдин премия гуда), пуд лагьай чка – Украинадай тир Руслана Ковалди кьуна (адаз 10 агъзур доллардин кьадарда аваз пулдин премия гуда).

19-20-октябрдиз кьиле фейи конкурсдин очный паюна Россиядай, Азербайжандай, Канададай, Китайдай, Израилдай, Монголиядай, Испаниядай, Молдавиядай, Туьркиядай, Украинадай, Кьиблепатан Кореядай ва Узбекистандай вири санлай 18 манидарди иштиракна.

Жюридиз СССР-дин халкьдин артистка, Муслим Магамеван уьмуьрдин юлдаш Магамаева Тамара Синявскаяди председателвална. Жюридин дестедик «геликон-опера» Москвадин музыкадин театрдин художественный руководитель Дмитрий Бертман,  Озимода авай вирихалкьарин операдин искусстводин академиядин художественный руководитель Винченцо де Виво, Италиядин манидарар Франко Фарина ва Алессандро Сафина, Азербайжандин пианист ва дирижер Фаргьад Шамси, «Бажарагъ ва агалкьун» образовательный фондунин художественный руководитель Ханс-Йоахим Фрай квай.

Тlвар кьунвай конкурс 2010-йисалай, 20 йисалай 35 йисал кьван яшда авай, чпихъ музыкадин рекьяй махсус образование авай манидаррин, музыкадин вузрин ва колледжрин студентрин арада, кьве йиса садра кьиле тухузва.

Конкурсда иштиракзавай манидарри-итимри М.Магамаеван операдин ва я эстрададин репертуардай мани тамамарун лазим я, дишегьли манидарри-дишегьлийри лагьайтlа, адан репертуардай дишегьлийриз талукь итр операдин манияр тамамарзава. Конкурсдин вахтунда фонограммайриз рехъ гузвач – анжах оркестрдин дестедихъ галаз жанлу манияр тамамарна кlанзава.

«Лезги газет»


Всего просмотров: 96

Читайте также: