Лезги чIалан лап хъсан муаллим

И йикъара Махачкъаладин 11-нумрадин гимназияда Вирироссиядин «Хайи чIалан лап хъсан муаллим – 2019» конкурсдин республикадин пай кьиле фена.

«Лезги газетдиз» Мегьарамдхуьруьн райондин пресс-къуллугъди хабар гайивал, лезги чIалан муаллимрин арада Гъепцегьрин мектебда лезги чIаланни эдебиятдин тарсар гузвай Румина Абдулгьалимова гъалиб хьана.

Къейд ийин, тIвар кьунвай конкурс гьар йисуз Дагъустан республикада кар алай проектар уьмуьрдиз кечирмишунин, яратмишунин саягъда кIвалахзавай муаллимриз куьмек гунин, милли чIаларин метлеб хкажунин макьсадралди тухузва. Пуд йикъан къене республикадин хайи чIаларин 40 муаллимди иштиракна. Абуру ачух тарсар гана, мастер-классар къалурна ва инновациядин проектар раижна.

Конкурсдин нетижада «Лезги чIал» номинацияда Румина Абдулгьалимова I дережадин дипломдиз лайихлу хьана.

Акьалтзавай несилдиз хайи чIал чирзавай муаллимдихъ гележегда мадни чIехи агалкьунар хьурай!

«Лезги газет»


Всего просмотров: 15

Читайте также: