Лайихлувилелди акьалтIарна

Дербентдай тир кьегьал лезги, чи республикадилай къецени  тIвар-ван авай спортсмен Магьарам Гьасанханова физкульту­радинни спортдин хиле вичин гзаф йисарин баркаллу рехъ нубатдин агалкьун къазанмишуналди акьал­тIарна. Белоруссия­дин мер­кез тир Минскда 70-73 яшара авай спортдин ветеранрин арада кьезил атлетикадай кьиле фейи международный турнирда Россиядин хкягъай командадик кваз 45 метрни 94 сантиметрдин мензилдиз копье гадаруналди М.Гьасанханова 12 спортсмен вичиз кумукьуналди, 1- ва ядро гадарунайни 2- чкаяр кьуна.

Гзаф шадвализ жедай, дамахуниз лайихлу кар я: 1965-йисалай гатIунна 2019-йисни кваз, чи уьлкведин ва международный турнирра  лайихлувилелди иштиракуналди Магьарам Гьасанханова къазанмишнавай къизилдинни гимишдин (кьегьалди 3 — чка садрани кьурди туш) медалрин, кубокрин, дипломрин ва къиметлу пишкешрин сан-гьисаб авач!

И мукьвара Дербент шегьерда спортдин ветеран Магьарам Гьасанханован нубатдин гъалибвилиз ва ада спортда вичин баркаллу рехъ акьалтIаруниз бахшнавай шад мярекат кьиле фена. Анал рахай шегьердин кьилин сад лагьай заместитель Рустамбег Пирмегьамедова спортдин  хиляй  шегьердин вилик лайихлувилерай М.Гьасанхановав къиметлу сав­кьат вахкана, уьлкведа физкультура ва спорт вилик тухуник лайихлу пай кутунай, гзаф йисара спортдиз вафалу хьунайни адаз РФ-дин спортдин министр Павел Колобкова рахкурнавай чухсагъулдин чар кIелна.

Вичин нубатдай яз, Магьарам Гьасанханова инлай кьулухъ спортдин рекьяй вичин теж­риба жегьилар спортдал машгъуларун патал серфдайди малумарна.

Чи мурадни баркаллу ве­терандихъ яргъи ва сагълам уьмуьр, акьалтзавай несил спорт­дал желбунин карда агалкьунар хьун я! Аферин!

Нариман Къарибов


Всего просмотров: 37

Читайте также: