Курхуьрел лезги чIалан муаллимрин семинар кьиле фена

25-апрелдиз Дагъустандин образование вилик тухунин ин­ститутдин (ДИРО) образованидин кафедради Сулейман-Стальский райондин Курхуь­руьн М.Рагьимован тIварунихъ галай 1-нумрадин СОШ-дин би­недал хайи чIалан ва литературадин муаллимрин семинар кьиле тухва­на­. “Хайи чIалай ва литературадай тарсар гунин кIвалахда алай аямдин образованидин технологияр” кьил алаз тешкилай и мярекатда республика­дин ви­ри пипIерай лезги чIалан ва литературадин 80-далай гзаф муаллимри иштиракна.

Мярекат ачухай школадин директор Мегьамедкерим Гьасанбегова кIватI хьанвайбур тебрикна. Гуьгъуьнлай рахай ДИРО-дин ФО-дин кафедрадин заведующий, филологиядин илимрин кандидат Гьабибат Гьажимура­довади чIалар хуьнин ва гегьеншдиз ишлемишунин рекье гьалтзавай четин­вилерикай, и месэла алай вахтунда авай гьалдикай ва гележегдин мумкинвилерикай лагьана.

Мярекат тешкилай, ам чешнеллудаказ кьиле финик пай кутур ДИРО-дин ФО-дин кафедрадин старший преподаватель Нагима Таймуровади  семинардин иштиракчийрихъ галаз санал  хайи чIал хуьнин рекье гьалтза­вай четинвилер веревирдна. Гьа и кафедрадин старший преподаватель Райгьанат Юсупова  школада дидед чIалай тарс  тухудайла, алай аямдин гьихьтин къайдаяр ишлемишиз жедатIа, гьадал акъвазна.

Сулейман-Стальский райондин информациядинни методикадин центради ва хайи чIаланни литературадин муаллимрин ассоциацияди кьиле тухванвай кIвалахдикай и тешкилатдин председатель Гуьзел Межидова  ра­хана. Ада  дидед чIал хуьнин ва виликди тухунин карда куьмекар гунай райондин кьил Нариман Абдулмуталибоваз ва Имам Яралиеван мергьямат­лувилин “Умуд” фондуниз райондин школайрин муаллимрин ва аялрин патай чухсагъул лагьана.

Райондин тIимил аялар авай школайра  культурадинни машгъулардай  мярекатар кьиле тухун гьикьван важиблу ятIа, гьадакай шаир Сажидин Са­­идгьасанов рахана. Хайи чIалай ва литературадай тарсар гудайла, алай аямдин технологийрикай менфят къачунин важиблувиликай Курхуьруьн 1-нумрадин мектебдин лезги чIалан ва литературадин муаллим Мая Ра­гьимовади лагьана.

Семинардин сергьятра аваз мярекатдин иштиракчияр лезги чIалан вири­далайни хъсан муаллимрин мастер-классриз фена. Ина абур хайи чIалан тарсар алай аямдин технологияр ишлемишунин куьмекдалди гьикI туху­да­тIа, гьадахъ галаз таниш хьана.

Семинардин тешкилатчи, “ИМЦ” МКУ-дин методист Назират Азимова­ди  къейд авурвал, ихьтин мярекатрихъ хайи чIал хуьнин ва виликди тухунин­, акьалтзавай несил ватанпересвилин руьгьдаллаз тербияламишунин жигьет­дай важиблу метлеб ава. “Хайи чIал — им халкьдин руьгьдин культура ага­кьарзавай алат, инсан и ва я маса миллетдин векил тирди, адахъ хайи халкь авайди тестикьарзавай виридалайни гужлу лишан я. Гьаниз килигна,­ школайра дидед чIалан тарсар гунихъ кьетIен важиблувал ава”, — къейдна ада ва мярекатдин мугьманризни муаллимриз семинарда активнидаказ иштиракунай чухсагъул лагьана.

Чи мухбир


Всего просмотров: 52

Читайте также: