“Куьреда – КIварчагъ дереда”

КIварчагъар чи дередин хуьрерикай чIехи тарих авай хуьр я. ЧIехи тарих авай хьиз, адахъ тариф авуниз лайихлу крарни ава. Зи хайи хуьр КIварчагъа алимар, муаллимар, профессорар, духтурар, шаирар ава. Абурукай сад чи гьуьрметлу муаллим,шаир  Важибат  Мирзеагъаевна  Насруллаева  я.

Важибат 1948-йисан 28-январдиз КIварчагърин хуьре муаллим  Абасов Мирзеагъадин хизанда дидедиз хьана.

Мектеб хъсан чирвилер аваз 1963-йисуз акьалтIарна ам Дербентдин педучилищедик экечIна. 1967 – йисуз ам акьалтIарна, хайи хуьруьн мектебдиз кIвалахиз хтана.

1967-1985-йисара ада гъвечIи классриз тарсар гана. Важибат муаллим педучилище акьалтIа­ру­нал­ди секин хьана ацукьнач.1981-йисуз ам ДГПИ-дин математикадин факультетдиз гьахьна. И вуз акьал­тIарна, 1990-йисалди хайи хуьре ма­тематикадин тарсар гана. Мектебда математикадин муаллимар гзаф хьуниз килигна, ам лезги чIа­ланни литературадин тарсар гунал элячIна.

“Педучилищеда лезги чIаланни литературадин тарсар гайи муаллим ва шаир рагьметлу Абдул Муталибова чак гьамиша хайи чIал кIан хьунин гьевес кутадай. Ам заз гзаф кIандай муаллим тир”, – лу-гьуз­ва Важибат муаллимди. Зунни­, Важибат муаллимди тарсар гайи аялрикай сад я. Завай ам дерин чирвилер авай муаллим хьиз, хъсан тербиячи дидени я лугьуз жеда.

Важибат муаллимди мектебда шииратдал рикI алайбурун “Да­гъларин цIирер” тIвар алай литературадин кружокдизни регьбервал гуз пара йисар я. Адан зегьметдиз еке къиметни ганва. Ам “РФ-дин умуми образованидин гьуьрметлу работник” тIварцIин сагьиб я.

Важибат муаллимди хизанда 4 велед тербияламишнава. ЧIехи руш Рузминади меркезда сифте “медсестра-тербиячи” курсар кIел­на, ахпа биологиядин факультет акьалтIарна, хейлин чкайра кIва­лахна. Гуьгъуьнлай экономикадин факультетни акьалтIарна. Алай вахтунда меркездин 10-нумрадин мектебда кьилин бухгалтервиле кIвалахзава. Амай веледрини чпин хиве авай везифаяр намуслувилелди кьилиз акъудзава.

Важибат муаллимдин уьмуьрдин юлдаш Насруллаев Алаудин (рагьмет хьурай вичиз) гьам хизанда, гьам халкьдин  арада гьуьрмет авай, рикI михьи инсан тир. Ада  “Коммуна” совхозда яхцIур йисуз уьзуьмчийрин  бригадирвиле  зегьмет чIугуна.

Важибат муаллим шииратдални рикI алай кас я. Ада хайи макандикай, адан гуьзелвиликай, уьзуьм­рин бегьерлу багъларикай, кIаниви­ликай, зегьметчи хуьруьнвийрикай  пара шиирар теснифна, “Уьмуьрдин легьзеяр” тIвар алай шииррин кIва­тIал 2007-йисуз чапдай акъудна­.

Насруллаева Важибат “КIвар­чагъ дере” шииррин кIватIалдин сагьибни я.

2018-йисан 28-январдиз Важибат муаллимдин 70 йис тамам хьана. Мубаракрай! Къуй адахъ мягькем сагъламвал ва яргъи уьмуьр хьурай.

Дильмира Ашурбегова


Всего просмотров: 17

Читайте также: