Къуръандин аятрин баянар

(Эвел-23-28-нумрайра)

  1. Ва (рикIел гъваш куьне гьакI­ни, эй Бану-Исраил) Чна куь “кьинералди мягькемарнавай икьрар” къачур вахт (Муса пайгъамбарди гъайи Таврат кьабулун патахъай) ва (куьне икьрар чIурайла) Чна куь винел ТIур дагъ хкажна (ва лагьана): “Къачу куьне кIевивилелди Чна квез ракъурнавайди (кьиле твах дуьздиз) ва яб це куьне (муьтIуьгъ хьухь)”. Абуру лагьана: “Чна яб гана (ви гафариз)­, ва чна муь­тIуьгъсузвална (ви эмирдиз)”. Абурув абурун рикIера кужумиз тунва (къизилдин) данадиз ибадатун, куфрдиз килигна. Лагь (вуна абуруз, эй Пайгъамбар): “Лап писди я квез куь иманди эмирзавай кар (пайгъамбарар яна кьин, данадиз ибадатун…), эгер куьн иман гъанвайбур ятIа!”.
  2. Лагь (вуна, эй Пайгъамбар, чпи, Женнет са чпиз жеда лугьузвай чувуд дин гвайбуруз): “Эгер Аллагьдин вилик “Эхиримжи Мескен” (Женнет) анжах са квез (кьилди) ятIа амай инсанар квачиз, кIан хьухь квез (тIа­лаба кван куьне) кьиникь, эгер куьн гьахъбур ятIа!”.
  3. Абуру тIалабдач гьич са чIа­вуз­ни, чпин гъилери “(авуна) вилик авурдаз” (чпи авур куфрдиз) килигна­. Ва Аллагьдиз хъсан чизва зулумкарар!­
  4. Ва гьакъикъатда, ваз абур (чувудар) виридалай гзаф къаних инсанар яз жагъида уьмуьрдихъ (абуруз кIанзава уьмуьр жезмай кьван яр­гъи­ди хьана) ва (гьатта) ширк авурбурулайни (гзаф, яни Женнетдихъ инанмишвал тийизвай мушрикрилайни артух); абуруз гьар садаз вичиз агъзур йисан уьмуьр хьанайтIа кIанза­ва. Ва а карди яргъал (гьич) къакъуд­дач ам (ЦIун) азабдикай — адаз яргъи уьмуьр гана лугьуз: Аллагьдиз аквазва эхир абуру вуч амал ийизва­тIа (ва абуруз жаза гуда)!
  5. Лагь (вуна чувуд дин гвайбуруз, Жабраил малаик чпин душман я ла­гьай, ада вагьй Мугьаммад пайгъамбардиз гъана лугьуз, ва я а малаикди Аллагьдин патай азаб гъизва­ лугьуз чпи пайгъамбарар таб яз кьур уьмметриз): “Вуж Жибрилаз душман хьанватIа, гьакъикъатда, ада авуднава ам (Къуръан) ви рикIиз Аллагьдин изиндалди, адалай вилик хьайибур (Къуръандилай вилик атай Ктабар) тестикьариз, дуьз рекьин регьбервал (Гьакъикъатдихъ рехъ къалурдайди) ва шад хабар яз муъминриз.
  6. Вуж Аллагьдиз душман хьан­ва­тIа (ятIа) ва Адан малаикриз, Адан расулриз, Жибрилаз ва Микаилаз (ни садаз а кьведакай душманвал­зава­тIа, ада муькуьдазни душманвалзава), гьакъикъатда, Аллагь кафирриз душман я!”.
  7. Ва гьакъикъатда, Чна (авудна) ракъурнава ваз ачух делилар ­(ая­тар)”, ва кафирвалзава абурухъ анжах фасикьар тирбуру  (Аллагьдиз муьтIуьгъ­виляй экъечIнавай­буру).
  8. (Бес) гьар сеферда абуру (чувуд дин гвайбуру) агьт гайила (икьрар кутIунайла) са кIапIалди (са паюни) абурукай ам “чилел гадарзавани” (абуру вири икьрарар чIурзава)?! Туш! Абурун чIехи паюни инанмиш­вал­завач (Аллагьди Мугьаммад пай­­гъам­бардиз ракъурнавайдахъ)!

(КьатI ама)

Таржума авурди — Ямин  Мегьамедов,

диндин рекьяй алим


Всего просмотров: 52
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире