Кьурагьа тIамайрай ва шеш-бешдай турнир кьиле фена

И йикъара Кьурагь райондин Кьурагь хуьруьн медениятдин кIвале райондин жегьилрин арада тIамайрал ва шеш-беш къугъунай райондин чемпионат кьиле фена. Идакай «Лезги газетдиз» райондин администрациядин пресс-къуллугъди хабар гузва.

Райондин физкультурадин, спортдин ва жегьилрин крарин рекьяй отделди тешкилай акъажунар женгчияр-интернационалистар рикIел хкунин йикъаз талукьарнавай.

Турнирда Кьурагь, КIири, Шимихуьр, Гелхен, Кутул, Штул ва Кумух хуьрерай 40-далайни гзаф жегьилри иштиракна. Ругуд сятда давам хьайи акъажунрин нетижада гъалибчиярни хъсан чкаяр кьурбур тайин хьана. ТIамайрал къугъуна 1-чка Абдуллаев Исмаила (Кумух) кьуна, 2-чка – Манчаров Алмаса (КIири), 3-чка – Бабахваев Саиджамала (КIири); шеш-бешдай 1-чкадал Шихкеримов Радик (КIири) хьана, 2-чкадал – Сулейманов Сейфудин (Гелхен), 3-чкадал – Разаханов Радик (Кутул).

Райондин физкультурадин, спортдин ва жегьилрин крарин рекьяй отделдин начальник Рамиз Рамазанова агалкьунар хьанвайбур тебрикна, абуруз медалар, грамотаяр, къиметлу затIар ва пулдин пишкешар гана.

«Лезги газет»


Всего просмотров: 18

Читайте также: