Куьгьнебур эвезда

Дагъустандин образованидин ва илимдин министерстводин пресс-къуллугъди хабар гузвайвал, республикадин 28 райондани 3 шегьерда мектебрин 10 йисалай гзаф вахтунда ишлемишнавай автобусар цIийибуралди эвезда.

РикIел хкин, идалай вилик РД-дин Кьил Владимир Васильева уьлкведин Президент Владимир Путинахъ галаз кьиле фейи гуьруьшдал цIи республикада цIийи 95 автобус маса къачун патал пулдин такьатар чара ийидайдакай хабар ганай.

Министерстводин векилдин гафаралди, алай йисуз мектебрин улакьрин парк цIийи хъувуниз Дагъустанда 186,5 миллион манат пул харжда. ЦIийи улакьрин патахъай игьтияж авай муниципалитетрин кьадар 31-дав агакьзава. Анра, санлай къачурла, 5 агъзурни 535 аялди кIелзава. И районризни шегьерриз 88 автобус герекзава. Улакьрин барадай игьтияж государстводин 7 идарадихъни ава. Абурув виридав йисан эхирдалди цIийи ула­кьар агакьда.

Министерстводин пресс-къуллугъди алава хъувурвал, алай вахтунда Дагъустандин умуми образованидин идарайра 610 улакьдикай менфят къачузва. Лагьана кIан­да, республикада ерли автобусар авачир мектебарни ава. Ихьтинбурун кьадар 150-дав агакьзава. Гьи райондиз шумуд улакь герек къвезватIа чирун патал РД-дин об­разованидин ва илимдин министерстводи алава серенжемар тешкил хъийидайвал я.

«Лезги газет»


Всего просмотров: 21

Читайте также: