Куьгьне келимаяр-лишанар

Дегь заманайрилай инихъ чи ата-бубаяр, уьмуьрда  гьалтзавай  лишанрихъ агъаз­, четин гьалар, бедбахтвилер арадай акъуд­дай  рекьер-хуьлер жагъуриз алахъайди яшлу ксариз чида. Махара, шииррани и кар  гьалтзава.

Начагъвилер, татугайвилер, кесибвилин  шартIар бязи гьерекатрихъ галаз алакъалу авурла, крар са жизви хъсанвилихъ  элкъведайдахъ инанмиш жез хьана. Инсанар патал абурухъ хийирдин лишанарни авайди малум я.

Жегьилриз, акьалтзавай несилриз  ата-бубайрин тежрибадикай-ирсиникай чир хьайитIа, пис туш. Абур чир хьуни чи жегьилрик­ ахлакьдин винизвилин, зайифвилериз муьтIуьгъ тахьунин гьис­сер­ кутада.

Ингье абурукай чи арайра лап гегьеншдиз амай келимаяр.

Яргъал сефердиз физ эгечIайла, рекьелай элкъвемир, крар туькIуьдач.

Эгер йифиз пулуникай хкудна, масадав вугайтIа, я бурж къачуртIа, кIвал кесиб жеда.

Йифиз, хуьруьн яргъай, кицIи къув ягъайтIа, крар хъсан жедач, сефилвал жеда…

РакIарин гуьрцелдал ацукьайтIа, берекат фида.

Яргъал сефердиз жуьмя юкъуз экъечIмир. И югъ михьи кпIа­ринди я.

Йифиз гьаятдиз, куьчедиз яд экъичмир. СтIалар шейтIандал, иблисдал алукьда, кьисас вахчуда.

Са кас кIваляй яргъал сефердиз физ экъечIайла, гьа геренда кIвал шиткимир, экв хкадармир.

Вечре кIекре хьиз гьараяйтIа, ам тукIуна, кIвалерал элкъуьрда. Ахпа ругуна неда.

Эгер са касдикай рахаз, гьа арада ам пайда хьайитIа, адан уьмуьр яргъи жеда.

Жуьмя юкъуз ксайла, кефсуз хьун мумкин я.

ЭрчIи гъилин капаш ква хьайитIа, пул къведа.

КIвачин тIегь (дабан) ква хьайитIа, рехъ акъатда.

Эгер къатканвай касдилай, ацукьнавай аялдилай кам ягъайтIа, уьмуьр куьруь жеда.

Рекье гьалтайдаз гьиниз физва лугьумир, бахтлу рехъ хьурай лагь.

Эгер такIан кас гьалтайтIа, рекьелай элкъуьгъ, крар туькIуьдач.

ИчIи квар гьалтайла, кIвалах тукIуьдач, ацIай кварци кIвалах туь­кIуьрда.

ЧIулав кац дуьшуьш хьун хъсан туш.

Эгер кIвале кьел чкIайтIа, къалмакъал жеда.

Кузвай хуьрекдиз уф гумир, хуьрекдиз цуькIуьн вегьей мисал я.

Эгер дишегьлиди кикIизвайбурун арадиз вичин шал, фите вегьейтIа, кукIунар акъвазда…

Абдулашим Рамазанов, зегьметдин ветеран


Всего просмотров: 81

Читайте также: