Ктабрикай рахана

И мукьвара Махачкъалада кардик квай   А.Тахо-Годидин тIварунихъ галай ДНИИП-да  “1-4-классрин лезги чIалан ктабрин къурулуш ва метлеб” темадай лезги чIалан муаллимрин, методистрин иштираквал аваз семинар кьиле фена.

Ам лезги чIалан муаллимар ктабрин къурулушдихъ, метлебдихъ ва сифтегьан умуми образованидин  ФГОС-дин шартIара мектебра чирвилер гунин кIвалах тешкилунин кьетIенвилерихъ галаз танишарунин макьсаддалди кьиле тухвана. Метлеблу мярекатда илимдин институтдин Дагъустандин литературайрин сектордин илимдин кьилин къуллугъчи, алим Къурбан Акимова, и инсти­тутдин хайи чIаларин сектордин илимдин чIе-хи къуллугъчи, ктабрин (учебный пособийрин) автор Жаклина Мейлановади, шегьеррин, районрин образованидин управленийрин методистри, Ахцегь, Мегьарамдхуьруьн, Су­лейман-Стальский, Кьурагь, Дербент районрин, Махачкъала, Каспийск, Дербент, Да­гъус­тандин Огни шегьеррин мектебрин лезги чIалан муаллимри иштиракна.

Мярекат ачухай Ж.Мейлановади къейд авурвал, образованидин гьалар цIийи хъувунин карда важиблу камарикай сад алай девирдин истемишунриз жаваб гузвай ктабар, методикадин кIватIалар арадал гъун я. Ада шегьеррин, хуьрерин мектебра цIийи ктабрай кIвалах тешкилдай алай аямдин къайдайрикай, хайи чIал хуьнихъ ва аялриз чирунихъ еке эгьмият авайдакай ихтилатна.

Малум тирвал, 1-4-классар патал лезги чIа­лан ктабар, гьакIни и мукьвара чапдай акъатнавай букварни (автор В.Бабаев я) мектебрив агакьнава. ГъвечIи классра хайи лите-ратурадай кIелунин ктабарни мукьвара чапдай акъатдайвал я.

Ктабрин гьакъиндай чпин фикирар Махачкъала шегьердин 1-нумрадин гимназиядин, 48-нумрадин, Дербент шегьердин 15-нумрадин, Ахцегь ва Агъа СтIал-Къазмайрин мектебрин муаллимри — И.Амахановади, Ш.Хибиевади, Р.Алиевади, С.Асваровади, Н.Шихнебиевади лагьана. Абурун фикирдалди, чапдай акъуднавай ктабар ФГОС-дин шартIа­рив кьазвайбур, метлеблудаказ ва итижлудаказ кIвалах тешкилиз жедайбур хьанва. Кта­бар адан текстерихъ галай ранглу шикилрини, суьретрини къешенгарнава. МискIалар, мисалар, фад-фад кIелдай келимаяр, яратмишунин, къугъунрин жуьреда кьилиз акъуддай тапшуругъарни аялрин фикир желбдайбур я.

Эхирдай Ж.Мейлановади муаллимрин, методистрин суалриз жавабар гана.

Лезги Фетгьуьллагь


Всего просмотров: 152

Читайте также: