Ктабар маса къачунва

Дагъустан Республикада хайи чIа­ларин 340 агъзурдалай гзаф ктабар маса къачунва. Идакай  РД-дин образованидинни илимдин министерствода  хайи чIалар хуьнин месэладай  кьиле фейи  элкъвей столдихъ хабар гана.

Мярекатда РФ-дин  просвещенидин министрдин заместитель Виктор Басюка­ ва Россиядин халкьарин хайи чIалар хуьнин ва абур чирунин Фондунин руководитель Татьяна Кортавади иштиракна.­

РД-дин образованидинни илимдин министр Уммупазил Омаровадин гафаралди, дидед чIаларин ктабрин эхиримжи партия Дагъустанда 5 йис идалай ви­лик  чапдай акъуднай. Гьаниз килигна­,  эхиримжи кьве йисуз и рекье  гегьенш­ май­­данра кIвалах тухузвай.  2018-йисуз республикадин 8 халкьдин чIа­ларал кхьенвай 155 агъзур ктаб маса къачунай. Абур мектебрин сифтегьан классар патал рекье тунва. Алай йисуз, У.Омаровади лугьузвайвал, мад 185 агъзур ктаб (“Букварь” ва “Литературадин кIелун”) къачунва, абурай 1-4-классра кIел­за­вай аялри чирвилер къачузва.

Министрди гьакIни муаллимар гьазурунин рекье тухузвай кIвалах­ди­кайни суьгьбетна. Ада хабар гайивал, эхиримжи йисара хайи чIаларин 2500-далай гзаф муаллимри, махсус курсара иштиракуналди, чпин пешекарвилин дережа хкажна.

Татьяна Кортавади вичи регьбервал гузвай Фондунин кIвалах­ди­кай, мярекатда иштиракай муаллимри лагьайтIа, республикадин мектебра хайи чIаларин тарсар тухузвай  тегьердикай суьгьбетна.

Амина Муслимова


Всего просмотров: 58

Читайте также: