Ктаб раижна

3-декабрдиз Махачкъалада, Р.Гьамзатован тIварунихъ галай Милли ктабханада афоризмайрин устад Демир Беган (Демирбег Эмирбегов) “Святилище для ошибок” тIвар алай цIийи ктабдин презентация кьиле фена.

Дагъустандин писателрин Со­юзди кьил кутур мярекатда писателри, шаирри, муаллимри, алимри, студентри ва автордин багърийрини дустари иштиракна. Залда “Бажарагъдин бегьер” лишандик кваз писателдин яратмишунриз талукь выставкани тешкилнавай.

Демир Бег камаллу келимаяр кхьизвай къелемчи хьиз фадлай машгьур я. Автордин цIийи ктаб, “Евразиядин сесер” лишандик кваз, алай аямдин художественный таржумайрин “Таврида” центради Симферополь ­шегьерда урус чIалал чапдай акъуд­нава. Афоризмаяр лезги чIа­лай урус чIалаз таржума авунвайди Ильяс Гьажиев я.

Мярекатдин иштиракчийриз неинки цIийи ктабдихъ, гьакI автордин уьмуьрдинни яратмишунрин рекьихъ галазни мукьувай та­ниш жедай мумкинвал хьана.

Ктабда гьатнавай лап куьруь, амма камаллу эсерри кIел­за­вайбуруз насигьатар гуда, и ва маса месэлайрин патахъай веревирдер ийиз тада.

Ктабдиз сифте гаф кхьей писатель Мамед Халилова къейд авурвал, Демир Бег камалэгьли-философ, гафунин художник, хъсан фикиррив ацIанвай куьруь эсеррин устад я.

Эхирдай авторди иштиракчийриз вичин ктабарни пиш­кешна.

К.Ферзалиев


Всего просмотров: 54
Подпишитесь на наши каналы:

Читайте также:


Новости партнеров