Кlахцугъвийриз савкьатна

И йикъара Сулейман-Стальский райондин Кlахцугърин хуьре шад гьалара воркаут-майдан ачухна. Идакай «Лезги газетдиз» райадминистрациядин пресс-къуллугъди хабар гузва.

Къейд ийин, спортдал машгъул жедай тадаракрин майдан жегьилрин парламентдин дустарин мергьяматлувилин такьатрихъ эцигна. Хъсан кардик райадминистрациядини къуьн кутуна.

Жегьилрин парламентдин векилри майдан туькlуьрунин фикир малумарайла, райондин кьил Н.Абдулмуталибова разивал гана. Жегьилри ихьтин жуьредин крарик идалай виликни кьил кутунай.

Шад мярекатда райондин кьил Нариман Абдулмуталибова, райадминистрациядин жавабдар къуллугъчийри, «Федерация Воркаута РД» общественный тешкилатдин президент Саид Маллаева, хуьруьнэгьлийри ва масабуру иштиракна.

Иштиракчийри кlахцугъвийриз спортдин тадаракар алай майдан мубаракна, гележегдани хъсанвилер хьун алхишна. Жегьилрин парламентдин активист, райондин Собранидин депутат Мегьамед Алиева къейд авурвал, ихьтин жуьредин крарик гележегдани кьил кутада.

Эхирдай жегьилри жуьреба-жуьре турникрал чпин алакьунар къалурна.

“Лезги газет”


Всего просмотров: 35

Читайте также: